Bandièra01 capçalera  1180x150: Novestivada

Actualitats

La Comission Europèa prepausa un labèl “verd” pel nuclear e pel gas

Los govèrns europèus, e tanben l’eurocambra, pòdon empachar la proposicion de Brussèlas, mas lor cal una larga majoritat per s’i opausar

| Jack_ma

Tèxte legit

La Comission Europèa a presentat una proposicion formala per donar un labèl “verd” al nuclear e al gas, de fonts d’energia que considèra ela de transicion. O a fach en despièch de l’oposicion dels expèrts consultats per la quita CE, que veson amb un chepic màger l’impacte environamental. Pasmens, Brussèlas defend l’idèa que seriá una manièra realista e pragmatica d’accelerar la transicion climatica dins l’Union Europèa. “Lo gas e lo nuclear son pas verds en se, mas permetràn la transicion devèrs un modèl energetic duradís”, çò asseguran de fonts comunautàrias. Se dobrís ara un periòde de sièis meses d’intensas negociacions.
 
Los govèrns europèus, e tanben lo Parlament Europèu, pòdon empachar la proposicion de Brussèlas, mas lor cal una larga majoritat per metre lor vèto. Per ara, i a de discordàncias dins lo club europèu, sustot perque França e Alemanha son pas brica d’acòrdi a prepaus de la catalogacion del nuclear. De son caire, lo movement ecologista es totalament desfavorable a facilitar los investiments privats en infrastructuras de gas e nuclear perque considèran qu’aquò endarrierarà lo desplegament de las energias renovelablas. Mas la CE revendica qu’a mes sus la taula una proposicion equilibrada que pren en compte l’interès de totes los actors.
 
 
Que ditz la proposicion de la CE?
 
La guida pels mercats financièrs de la CE considèra que qualques centralas nuclearas e tecnologias del gas son d’energias duradissas de transicion. Dins aquel sens, los reactors auràn un labèl verd fins a 2045 e las infrastructuras del gas fins a 2030.
 
Ça que la, aquel label exigirà qualques requerenças addicionalas. Dins lo cas del gas, deuràn èsser de sits qu’emetan mens de 270 gramas de CO²/kWh e que remplacen d’energias mai polluentas, coma lo carbon, dins los païses qu’encara las emplegan. Tanben s’exigirà qu’en 2035 los sits foncionen al 100% amb de gases basses en carbòni.
 
Quant als investiments en sits nuclears, solament aurián lo label verd se gerisson los degalhs radioactius de naut risc. Dins aquel sens s’exigís que los mai perilhoses s’entèrren dins de depauses sosterranhs prigonds.
 
 
Division
 
Ara lo Conselh de l’UE, ont s’amassan los estats e lo Parlament Europèu, a sièis meses per acceptar o metre son vèto a la proposicion qu’a l’ora d’ara devesís los govèrns e los partits poltics europèus.
 
França quicha per inclure lo nuclear coma energia duradissa dins la classificacion europèa, del temps qu’Alemanha fa una escomesa pel gas. Los païses de l’èst, que lor còsta dese passar del gas, veson la proposicion de la CE amb de bons uèlhs. Per contra, Espanha, Àustria, Danemarc e Luxemborg son la minoritat que refusan lo labèl verd pel gas e pel nuclear.
 
Dins lo Parlament Europèu se replican, en partida, las dinamicas estatalas. Lo Partit Popular Europèu es per l’inclusion del gas coma energia verda, del temps que lo grop liberal Renovelar Euròpa, contrarotlat pel partit del president francés Emmanuel Macron, es en favor del nuclear. Per contra, los eurodeputats ecologistas e de l’Esquèrra Unitària ensajaràn de blocar lo plan de Brussèlas.

 
 
 
 abonar los amics de Jornalet

 


 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

CHIPO Fijac
6.

ADISSIATZ

Lo nucleari es pas considerat coma una energia fossil ??

Nos caldriá saber de que comptan exactament de Co2 per las centralas nucleàrias mas vesem que sem dins un òrdre de grandor similar amb las eolianas..sens los rebuts e lo dangièr... (melhor me crompi una plaça sus Venus)

bona jornada.

  • 0
  • 0
Cheng Huan
5.

#4

Las informacions venen de : https://www.rte-france.com/eco2mix

i son mantunas explicas e atanben lo pretz prevezit eca....

ai aquò sus l'esmarfon, tanben pòdi siègre en temps real lo consum e los pretz

  • 4
  • 1
Pascau
4.

#3 D'on vienen aqueras informacion svp? Jo qu'espii las videos de "Le Réveilleur" qui vulgarisan informacions scientificas sus las energias e lo nuclear. Qu'ei supèr interessant.

#1 Vertat que las dèishas son un problèma!

  • 2
  • 0
Cheng Huan
3.

Ara 04 de febrièr 12h47

Eolian = 6% de la produccionb electri en fransa

Nucleari 73%

fòto vòltaic 0%

Gas 12%

Bio energias 1%

Idrolic 6%

Carbon 1%


e exportem 2190 MW.

  • 2
  • 0
Cheng Huan
2.

Per fransa las emissions de CO2 en g eq. CO2/Kwh

Centrala nucleari de 6 entrò 12,7 g eq. CO2/Kwh

Eolianas terralas 12,7 g eq. CO2/Kwh

Eolianas de mar entre 14 e 18 g eq. CO2/Kwh

Fòto vòltaic 56 g eq. CO2/Kwh

Energias fossils

406 g CO2/kwh pel gas

1038 g CO2/Kwh centrala ambe carbon

  • 5
  • 0

Escriu un comentari sus aqueste article