Bandièra01 1180x150: Comuna de Tolosa

Actualitats

Irlanda del Nòrd: demissiona lo primièr ministre a causa dels contraròtles comercials deguts al Brexit

Es la segonda demission d’un primièr ministre en mens de sèt meses

Tèxte legit

Lo primièr ministre de l’Irlanda del Nòrd, Paul Givan, a anonciat sa demission a causa dels contraròtles comercials de la Grand Bretanha e de l’Union Europèa impausats per l’acòrdi del Brexit. S’agís de la segonda demission d’un primièr ministre nòrd-irlandés en mens d’un an. Qualques meses après lo Brexit, la cap del Partit Democratic Unionista (DUP), Arlene Foster, renoncièt d’efièch a son pòst de primièra ministra.
 
Givan remplacèt Foster en junh de 2021, mas a pas tengut la carga quitament sèt meses. Fasiá de meses que lo DUP protestava contra los contraròtles suls bens que travèrsan la mar irlandesa.
 
Tant Londres coma Brussèlas reconeisson que lo Protocòl sus l’Irlanda del Nòrd de l’acòrdi del Brexit pausa de problèmas als ciutadans e a las entrepresas d’aquel territòri. Lo protocòl foguèt pachat per l'UE e lo govèrn de Boris Johnson coma element de l’acòrdi de divòrci del Reialme Unit e de l’UE.
 
Aquel acòrdi intrèt en vigor al començament de 2021 e establís que lo nòrd d’Irlanda contunha d’èsser restacat al mercat unic de l’UE e que, per tant, las mèrças que se mòvon entre aquel territòri e la rèsta del Reialme Unit devon passar de contraròtles. Aital se capita que i aja pas una frontièra fisica entre l’Irlanda del Nòrd e la Republica d’Irlanda, que fa partida ela de l’UE.
 
Ara Brussèlas prepausa d’eliminar l’80% dels contraròtles agroalimentaris, valent a dire del sector mai afectat, mas Johnson insistís per tornar negociar l’acòrdi del Brexit.
 


abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
4.

#2 E de tot biais, la dominacion d'un grop per un autre non m'es sofribla, de ges de biais, quines que sián los grops considerats. Es la quita nocion de dominacion que vomissi.

  • 4
  • 0
Franc Bardòu
3.

L'autoritat exercida subre "lo riealme britanic" o es en anglés, non pas en picte, e s'exercís de Londres estant, non pas del Nòrd d'Escòcia. L'autoritat en Iralanda deuriá venir sonque d'Irlanda, e res mai. Es aquò, mon punt de vista caricatural, e o assumissi.

  • 5
  • 1
MOSCA CANHISCA
2.

#1 Caricaturau, com de costuma. Los "anglés" (que son sovent escocés, e donc presbiterians e non anglicans) que son en Irlanda deu nòrd despuish sègles (que n'i a tanben quauques uns en Irlanda deu sud, mes n'ac devetz pas saber). Au cap de sègles, lo dret de víver sus la tèrra deus sons ancèstres qu'ei aquesit. Aquò dit shens renonciar a l'objectiu d'ua Irlanda unificada. Que i ei tanben l'aspècte de classa, puishque son sovent los protestants mei praubes qui son mei nacionalistas. Las classas mejanas que son moderadas de l'un costat com de l'aute.

  • 3
  • 0
Franc Bardòu
1.

La question que me pausi ieu es : qué fan encara los Angleses e autres anglicanistas al nòrd de l'isla gaëllica d'Irlanda ?

  • 6
  • 3

Escriu un comentari sus aqueste article