Bandièra01 1180x150: Comuna de Tolosa

Actualitats

Sant Somplesi: de militants ecologistas an blocat qualques oras lo talhièr de construccion d’un depaus logistic gigant

Denóncian “una construccion desmesurada” que destruirà d’espècias protegidas

| Alternatiba Tolosa

Tèxte legit

Dijòus passat, un trentenat d’activistas bloquèron las doas intradas del talhièr de Terra 2 a Sant Somplesi (Galhaqués). Aqueles militants s’opausan als trabalhs de construccion d’un depaus logistic de 70 000 m2 qu’es per se bastir sus una zòna naturala. L’operacion s’acabèt amb l’intervencion de la polícia que faguèt partir los manifestants sens violéncia, çò rapòrta France 3.
 
 
Una plataforma logistica sus 70 000m2 que menaça tot un ecosistèma local
 
Sus un terren de 70 000 m2, una bastissa longa de 533 mètres sus 125 mètres de large e 14 mètres de naut se deuriá construire per aculhir una plataforma logistica giganta sus la zòna d’activitats de las Pòrtas de Tarn. I aurà 123 cais de cargament, çò es 500 passatges de camions semiremòrca per jorn. En tot, son 12 ectaras que seràn engolidas jol quitran.
 
Es per aquò que d’abitants, d’associacions e de collectius de defensa de l’environament an decidit de se mobilizar contra un projècte “d’un autre temps”, segon lors mots. Denóncian “una construccion desmesurada” que destruirà d’espècias protegidas. Demandan als elegits encargats del projècte l’arrèst immediat dels trabalhs e qu’aquestes se conformen a las preconizacions del GIEC pertocant la creacion d’activitats e la destruccion d’espacis naturals.
 
“Aquel projècte aurà un impacte màger sus la biodiversitat locala e destruirà tota una zòna naturala”, çò explica un militant d’ANV COP21.
 
 
Una denóncia sociala del projècte
 
“Aquela plataforma logistica se farà amb Amazon o un concurrent. Aquò favorizarà las importacions chinesas. De produches que circulan en camion e crèan fòrça pollucion. Aquò a pas res de veire amb los circuits corts. De mai, aquò crearà pas gaire d’emplecs, o alara d’emplecs precaris, sospagats” çò afortís Gwarr, un activista d’ANV COP21
 
Aquò fa ara mai de 3 ans qu’aqueles opausants batalhan contra Terra 2, e la mobilizacion se manten. Après l’accion de dijòus passat, ne preveson d’autras per tal que lo projècte aboque.

 
 
 
 

abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
1.

Lo sol mejan de blocar realament la bastison d'aquelas orrors industrialas es que quitar sine die de crompar qué que siá en linha a aqueles esclavagistas mercands de fadesa especiosas…

  • 13
  • 2

Escriu un comentari sus aqueste article