Una referéncia a un vèrs d’Els Segadors per anonciar la represa de la Superliga aquesta setmana. Dobertura dijòus de ser amb lo revenge de la finala: los Dragons Catalans tornaràn trapar en Anglatèrra lo campion St Helens. L’objectiu dels Sang e Aur es d’èsser encara melhors que la sason passada. Aquò vòl dire jogar lo títol e ganhar lo trofèu!

Dissabte, primièra partida oficiala en Superliga pel Tolosa Olimpic que reçaup a Ernèst Wallon los Gigants d’Huddersield. L’an passat, los tolosans an conegut una sason sens desfaita en Championship, mas ongan, los afars seràn d’una autra barrica. Se va caler installar dins la competicion e evitar l’opcion monta-davala coma los Centurions de Leigh la sason passada. La preparacion de la formacion es estada complicada en rason del virus. Lo capitani Ford partiguèt vaquí 3 setmanas. Lo centre Jussaume es nafrat al peronè aprèp la partida contra los Dragons… Demòra ara la vertat del terren per consolidar lo club dins son caminament!
 
De segur, cal que i aja lo mai de monde dins las tribunas, mas las doas partidas seràn retransmesas per BeInSport qu’anóncia la difusion de 9 rescontres jogats a Brutus, mai la represa de Sky-Sports per las partidas catalanas televisadas en Anglatèrra. Per Tolosa, quala serà la seguida de la difusion d’aqueste dissabte?
 
 
Elèit 1: la varianta Dragonets
 
La preséncia de la resèrva dels Dragons en Elèit 1 a un impacte segur sul debanament de la competicion. Atal, dissabte, sus la pelena de Sant Estève, Limós trapèt dins la formacion catalana onze jogaires qu’an seguida la preparacion de la sason de l’esquipa primièra. Los audencs sostenguèron la comparason, mas paguèron qualques maladreiças e qualques fautas d’indisciplina per pèrdre 20-18.
 
Dimenge, la marca èra de 8-8 a la pausa entre Tolosa e Albi, mas los tarneses fasián puèi la diferéncia: 31-8. Lo campion Lesinhan s’impausava logicament a Sent Gaudenç: 48-16. A Domèc, fàcia a Avinhon, Carcassona desvelopèt un jòc ofensiu de qualitat per faire plegar los provençals: 44-10.
 
Al programa de la dimenjada que ven, en cap d’aficha lo dèrbi a l’Agulha entre Limós e Carcassona. Se jogarà tanben las partidas Dragonets-Vilanòva, St Gaudenç-Albi e Avinhon-Lesinhan.
 
 
Austràlia: partida aborigèns-maòris en dobertura de sason
 
En Austràlia, aqueste dijòus, a Sydney, la sason 2022 se dobrirà amb lo doble afrontament femenin e masculin entre las esquipas dels aborigèns d’Austràlia e los maòris de Nòva Zelanda.
 
 
 
 
Alan Roch