De centenas de personas s’acampèron dimenge passat al lac de Montbèl (País d’Òlmes) en protèsta contra un projècte d’installacion d’un complèxe ostalièr sus una partida del lac. La protèsta respondiá a la crida del collectiu À pas de Loutre (A passes de loira) qu’amassa d’usatgièrs del lac, d’abitants del parçan e d’amoroses de la natura. La crida es sostenguda per d’associacions e de collectius per la natura e l’environament. Una peticion en linha amassa environ 4000 signaturas.
 
Lo complèxe ostalièr prevei l'installacion de 25 cabanas sus palfics sus 2,5 km dels 6 km de la broa del lac, una bastissa d’acuèlh de 500m², una piscina de desbordament, una palanca de 60 mètres sus una zòna umida... Los manifestants denóncian que lo projècte siá argumentat amb las paraulas “ecoresponsabilitat” e “integracion païsatgièra”, pr’amor qu’aquò “dona un imatge de consciéncia ecologica enganaira”. De prene en compte que lo projècte presenta un fum d’infrastructuras intrusivas coma d’accèsses per de veituretas electricas, de rets d’assaniment, d’electricitat, d'aiga, de bastiments d’acuèlh, una piscina, de batèls electrics... e tota una tièra de causas que van perturbar inevitablament los ecosistèmas.
 
Lo lac de Montbèl se creèt en 1977 e s’inaugurèt en 1985 amb la tòca d’aver una sorsa permanenta d’irrigacion pel parçan. Puèi, gràcias a la Lei Montanha, s’enebiguèt de bastir a mens de 300 mètres de la broa del lac, çò que l’ajudèt a desvolopar un ecosistèma excepcional.
 
A l’ora d’ara, en mai l’aiga que servís per irrigar, s’es desvolopat un torisme de campatge e d’espòrts aqüatics coma lo piroguisme o l’esquí aqüatic. Mas lo lac es environat d’arbres nauts e denses, e jòga un ròtle important coma ponch de refugi e alimentacion dels aucèls locals, dels aucèls migratòris e de rapina. Gràcias a tot aquò, lo sit es declarat zòna naturala d'interès ecologic, faunistic e floristic.