La sason de Superliga de 2022 s’entamenèt dijòus de ser amb lo revenge de la finala passada: Saint Helens/Dragons. Fasiá freg, la temperatura avesinava lo 0° jos una pluèja nevosa. Aquò incitèt las 2 formacions a una sesilha de rescalfament collectiu. Lo pilar sang e aur Dubson se’n tirèt amb un carton jaune. En fin de partida, per una carga a l’espatla e saludar benlèu sas colors novèlas, lo pilar Napa ajustèt lo roge al jaune!

Los catalans entamenèron plan la partida e Yaha marquèt lo primièr ensag de la sason sus una supèrba passa al pè de Josh Drinkwater. Los angleses van replicar e marcar un, puèi dos, puèi tres, puèi quatre ensages en trapant de baloards sus las alas, abans una penalitat de Tomkins, per menar 16-8 a la pausa. Encara aürós que los tustaires angleses encapèsson pas cap de las transformacions.
 
Lo segond temps se dobrís sus una penalitat anglesa e, mèstres de la palma, los Sants ajustaràn encara dos ensages per ganhar 28-8 e daissar los catalans amb plan d’interrogacions per la seguida. Una seguida que serà la recepcion de Wakefield aqueste dissabte 19 a Brutus (19 h).
 
Los Sants, eles, prometon l’infèrn als adversaris e an clarament fait part de lor objectiu: encadenar un quatren trofèu en seguida!
 
 
Los Gigants tròp grands per Tolosa
 
Per sa primièra partida en Superliga, lo Tolosa Olimpic recebiá dissabte de ser los Gigants d’Huddersfield a Ernèst Wallon. Los Blau e Blanc marcan los primièrs pels alièrs Matty Russell e Ilias Bergal per menar 10-0 a la 20a minuta. La maquina anglesa se met en marcha e Huddersfield torna a egalitat. La corna restontís, los angleses son dins lors 20 mètres mas en doas passas e 80 mètres de corsa dintran al vestiari en menant 16-10.
 
Dins lo segond temps, los Gigants privaràn los locals del balon e la defensa tolosana plegarà encara quatre còps dins lo darrièr quart d’ora. L’ensag de darrièra minuta del centre Gui Armitage passarà just un pauc de pomada sus la desfaita encaissada 14-42.
 
Lo Tolosa Olimpic mesura tre aqueste primièr rescontre lo saut qualitatiu e en intensitat entre Championship e Superliga. Seguís un desplaçament a Salford aqueste dimenge abans la venguda d’una brave talhon dins la capitala occitana: los Lops de Warrington, lo dissabte 26 de febrièr (18h).
 
De Lops que son anats ganhar a Leeds 22-20. Victòrias al defòra tanben per Wigan (24-10 cò d’Hull KR), Salford (26-16, a Castleford) e, dimenge, per Hull FC (16-12, a Wakefield)
 
 
Rescontres entre Maòris e Aborigèns per la represa en Austràlia
 
Aqueste dissabte 12 de febrièr, es a Sydney, al CommBank Stadium, que las oposicions entre los Maòris de Nòva Zelanda e los Aborigèns d’Austràlia dobrissián la sason NRL de 2022.
 
La confrontacion femenina vesiá la victòria de las Aborigènas: 18-8; se passèt a la ceremònia d’avantpartida entre haka maòri e dança amb lanças e lo drapèu oficial aborigèn costat australian: un moment d’emocion bèla.
 
Se la partida se debanèt en quatre quart-tempses e amb mai de remplaçants que de costuma, aquò empachèt pas de veire una confrontacion d’una intensitat bèla e amb plan d’engatjament (un pauc tròp, de còps). Son los maòris que sortiguèron aqueste còp victorioses de l’afrontament: 16-10.
 
La represa del campionat se tendrà lo dijòus 10 de març.
 
 
Elèit 1: lo dèrbi audenc per Limós
 
Las partidas d’aquesta dimenjada son las que se devián debanar los 8 e 9 de genièr, abans una decision federala de repòrt.
 
Dissabte, foguèt pas aisit a Sant Estève als Dragonets de batre Vilanòva: 22-16.
 
Dimenge, a Limós, vila encara privada de son carnaval ancestral, l’ora èra a una autra tradicion bèla: lo dèrbi fàcia als vesins de Carcassona. Los locals se mostrèron mai realistas e entreprenents que los Canarís per ganhar 24-18. Los campions lesinhaneses rescontrèron una fòrta oposicion d’Avinhon, mas ganhèron 18-14.
 
Al programa de la dimenjada que ven: Albi-Carcassona (dissabte), Limós-St Gaudenç, Lesinhan-Tolosa e un prometeire Avinhon-Vilanòva.
 
 
 
 
Alan Roch