Bandièra01 1180x150: Comuna de Tolosa

Actualitats

crotz-tolosaCreated with Sketch.AuvèrnheAuvèrnheCastanhau

Una randolejaira de 25 ans tuada per un tir en Castanhau

Una jove femna es mòrta après recebre una bala perduda durant una caça del singlar. De personalitats politicas an relançat lo debat sus l’interdiccion de caçar lo temps de las dimenjadas e de las vacanças escolaras

| Emilian Robert Vicol

Tèxte legit

Una randolejaira de 25 ans foguèt tuada per bala, dissabte 19 de febrièr, a Cassanhosa (Castanhau), dins çò que revèrta un accident de caça.
 
La jove femna moriguèt sus plaça après aver recebut una bala perduda devèrs 15h, a l’endrech que se ditz la Becariá, mentre qu’una batuda als singlars aviá començat dins lo departament limitròf d’Avairon e se contunhava sus la comuna de Cassanhosa al moment dels faches, çò an precisat los gendarmas e la justícia interrogats pel quotidian local La Montagne.
 
La persona que tirèt lo còp de fuòc mortal, una caçaira de 17 ans, foguèt plaçada dimenge de matin en detencion pel motiu de “omicidi involontari”. Testada negativa a las drògas e a l’alcòl, foguèt puèi transferida a l’espital en estat de chòc.
 

Depersonalitatspoliticasparlandetragèdiainsuportabla ereclamanunareglamentaciond’urgéncia
 
Plusors personalitats politicas, ecologistas en primièr, reclamèron dimenge l’interdiccion de la caça las dimenjadas e durant las vacanças escolaras. “Una jove femna es defuntada perque es estada tocada per una bala pendent una partida de caça. Pensadas a sos parents. Nos cal mai reglamentar aquela activitat, i a urgéncia!”, çò a declarat lo candidat ecologista a la presidenciala, Yannick Jadot.
 
“Encara quantes mòrts abans que se decidisca de regular la caça, practica perilhosa e inumana? Al minim, enebir la caça la dimenjada e las vacanças escolaras, sul pic!”, çò a completat David Belliard (Euròpa Ecologia-Los Verds), adjonch de la consolessa de París e candidata socialista a la presidenciala, Anne Hidalgo.
 
“Lo bòsc deu aparténer la dimenjada als randolejaires, als passejaires. Amb cinc jorns de la setmana n’i a pro per caçar. Se deu pas plus anar en bòsc amb la paur al ventre”, çò apondèt l’eurodeputada Manon Aubry (França insomesa) dimenge sus la ràdio RMC.
 
La caça es un subjècte polemic que torna regularament dins lo debat politic en França, país europèu ont se compta lo mai de caçaires, amb 1,2 milion de practicants, sus environ quatre milions que possedisson un permés. França es tanben lo sol país europèu que permet de practicar totes los jorns durant la sason (de l’auton fins a la prima), mentre que lo Reialme Unit, Itàlia, los Païses Basses o encara Portugal an impausat un o plusors jorns d’interdiccion.
 
Dempuèi 2000, 3325 accidents de caça son estats recensats, qu'an provocat la mòrt de 421 personas, segon lo bilanç de l’Ofici Francés de la Biodiversitat de julhet de 2020.

 
 
 
 abonar los amics de Jornalet

 


 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pascau
3.

#1 Que cau interdíser la caça. Qu'ei dangerós, immorau e inutil.

  • 3
  • 2
Pitaluga
2.

Coma diriá lo president d'aquela chorma:
"Es un degalh colateral."

  • 3
  • 0
Hilou
1.

que cau interdíser las passejadas pendent las batudas, qu'ei hèra dangerós!

  • 7
  • 1

Escriu un comentari sus aqueste article