Bandièra01 capçalera  1180x150: Botiga

Actualitats

Honduras: an remes en libertat los activistas environamentalistas de Guapinol

Après dos ans de preson preventiva e un procès internacionalament contestat, los an relaxats

Tèxte legit

Venon d’èsser liberats en Honduras los activistas environamentalistas de la ribièra Guapinol après dos ans de preson preventiva. Fa doas setmanas, lo tribunal los aviá declarats colpables. Mas a l’ora de la lectura de la senténcia, lo 21 de febrièr passat, foguèron relaxats e meses en libertat.
 
Los faches se passèron en 2018, quand de nombroses ciutadans organizats en un comitat de defensa de l’environament bloquèron un projècte minièr en Honduras, que polluissiá la ribièra Guapinol. En seguida, arrestèron arbitràriament 8 activistas dont 6 foguèron encarcerats preventivament e acusats de delictes de damatges. Amnestia Internacionala e lo comitat dels Dreches Umans de l’ÒNU seguissián l’afar.
 
La quita concession de la mina èra contestada per irregularitats a l’expedicion de las licéncias e sustot per las grèvas consequéncias sus l’environament e suls mejans de vida dels abitants de la region, çò rapòrta Directa.
 
“Son de victimas d’una detencion arbitrària e d’un jutjament penal infondat, unicament per lor trabalh legitim de defensa del drech a l’aiga e a un environament san”, çò disiá Amnestia Internacionala. De son caire, lo Naut Comissariat de las Nacions Unidas pels Dreches Umans mostrèt son chepic e qualifiquèt los activistas de “defensors de la tèrra e l’environament qu’exercisson un trabalh remarcable en favor de la democracia”.
 
 
L’esperança del cambiament de govèrn
 
La senténcia arriba pauc après la presa de possession de la presidenta Xiomara Castro, la primièra femna progressista après mai d’un sègle de bipartidisme dels partits liberal e conservator. Dins son primièr discors coma presidenta, aviá demandat la liberacion dels activistas de Guapinol e una enquista per l’assassinat de Berta Cáceres, la cap indigèna qu’aviá dirigit un movement de resisténcia del pòble lenca contra una restanca.
 
 
 
 

 
abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article