Lo rugbi de 13 es un espòrt d’atacas. Aquò vòl dire que, per respondre als adversaris, cal saupre defendre: placar, placar e placar encara, se replegar, anticipar...

LosDragonsganhanmercéaladefensa
 
Mercé a una defensa de fèrre, los Dragons Catalans s’impausèron a Leeds, dijòus de ser; fasiá freg a Headingley, los angleses marquèron los primièrs, mas Yaha profeitava d’una passa sautada de Tomkins per egalizar: 4-4 a la pausa; dins lo segond temps, Sam Kasiano jogava lo dobertura per lançar lo jove Chan a l’ensag. Los Sang e Aur menavan 10-4 e tenguèron puèi còp maugrat la sortida de Sam Tomkins que se planhiá del genolh, un ensag refusat al vidèo, un carton jaune pel menaire Pearce per una accion gaire dangierosa… Novèl viatge en Anglatèrra per anar desfisar Warrington aqueste divendres.
 
De Lops que se son venguts impausar a Ernèst Wallon fàcia al Tolosa Olimpic en prenent lo larg dins lo primièr temps: victòria 32-18. L’entraïnaire Houlès trapa que son esquipa comença a s’adaptar al nivèl Superliga, mas un autre talhon bèl arriba a Tolosa dissabte que ven: Wigan. Los Blau e Blanc an recrutat lo jove arrièr d’Huddersfield: Olly Ashal-Bott.
 
Warrington e Wigan (venceire d’Huddersfield 22-12 ) fan partida de las esquipas amb 3 victòrias en companhiá del campion St Helens que bat Wakefield 20-4.
 
Las doas esquipas d’Hull ganhan Hull-KR 26-10 fàcia a Castleford e Hull FC passa un 46-16 als Diables Roges de Salford.
 
 
A Carcassona, lo dèrbi audenc
 
Albi es l’esquipa en forma de l’ora. Los tarneses se van impausar largament a Vilanòva: 41-16. A Sant Estève, los Dragonets atacan d’un bon pè la partida: 26-6 a la pausa; dins lo segond temps, Avinhon enauçarà lo nivèl de jòc e anirà quèrre lo punt de bònus defensiu: desfaita 24-32.
 
Dimenge, èra temps de dèrbi a Domèc. Dins lo primièr temps, lo tresena-linha canari Boregba traucava dos còps lo ridèu defensiu verd e blanc per permetre a Carcassona de menar 15-6 a la pausa. Dins lo segond temps, l’arbitre foguèt menat a sortir carton roge e cartons jaunes, que l’ambient èra plan caud. Carcassona contunhèt de faire la corsa en tèsta en prenent los punts que passavan (penalitats e tombats), tot en demorant jos la menaça dels vesiteires. Dins las darrièras minutas, un ensag transformat e un tombat permetián als carcassoneses de ganhar e de sortir Lesinhan del punt de bònus defensiu: victòria dels locals 31-18. Primièra desfaita de la sason pels campions. La partida St Gaudenç-Tolosa es remesa al 24 d’abril.
 
Las esquipas d’Elèit 1 auràn dreit a una dimenjada de pausa per entamenar març. La setmana seguenta, en cap d’aficha, mancarà pas d’interès la partida entre Albi e Dragonets.
 
 
 
 
Alan Roch