Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Eth Musèu dera Val d’Aran que pòrte era Querimònia as escòles deth país

Eth Musèu dera Val d’Aran qu’a organizat entà totes es escòles dera Val ua activitat restacada damb era commemoracion deth 700au aniversari der autrejament dera Querimònia as aranesi.


Era tòca qu’ei de sajar qu’es escolans e poguen conéisher ua part essenciau dera istòria dera Val d’Aran laguens de çò qu’ei nomenat coma educacion informau.
 
Era idèa qu’ei d’aportar ua manèra diferenta d’arténher coneishements a trauèrs d’un aprenentatge mès actiu, damb mejans mès participatius, manipulatius e ludics.
 
Era elaboracion deth talhèr partís d’uns objectius generaus e competenciaus e d’ua seleccion de contenguts que son es que mèrquen eth desvolopament e eth guidon dera activitat.
 
Ath delà, era activitat qu’ei pensada entà qu’es estudiants non s’agen de desplaçar e atau, son es educadores deth musèu que se desplacen entàs diuèrses escòles damb eth materiau de besonh.
 
D’un costat, se debane un talhèr de representacion teatrau sus er autrejament dera Querimònia entàs escolans des cicles infantil e iniciau de primària. Per aute costat s’ei premanit un talhèr entara “Recèrca a compdar d’un objècte: era Querimònia e era sua cronologia” entà adaptar-se ath nivèu cognoscitiu e de coneishements apropriats a cada edat e a cada curriculum oficiau.
 
Es talhèrs se realizen dempús hè quaui dies e s’amiaràn a tèrme en totes es escòles dera Val d’Aran enquiath 1r de març.
 
Era Querimònia qu’ère un ensems de privilègis concedidi ara Val d’Aran en 1313 peth rei Jaime II d’Aragon, Catalonha e Valéncia, que confirmèc es Servances e Constitucions des sòns abitants a cambi deth pagament d’un tribut, eth Galin Reiau.
 
 
 
 
CGA/Red.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article