Bandièra01 1180x150: País Invisible

Actualitats

Polonha: l’estranha detencion d’un jornalista basco acusat d’èsser “pròrús”

L’intelligéncia espanhòla aviá enquistat sul jornalista, acusat d’aver trabalhat al jornal basco Gara

Tèxte legit

Diluns passat, la polícia polonesa arrestèt lo jornalista basco, Pablo González, mentre que fasiá son trabalh. Assabentava sus la situacion dels refugiats ucraïneses a la frontièra. Son avocat es Gonzalo Boye, lo meteis que defend Carles Puigdemont. Boye assegura qu’es l’intelligéncia espanhòla qu’a acusat lo jornalista d’èsser pròrús per lo far arrestar per las autoritats polonesas.
 
González es collaborador de divèrses mèdias dont lo canal de television espanhòl La Sexta, lo jornal Público e lo quotidian basco Gara. L’acusan “d’accions contra l’interès de l’estat polonés”. Qualques setmanas abans, lo 6 de febrièr, l’avián detengut los servicis d’intelligéncia ucraïneses quand raportava sus la situacion en Donbass, abans l’invasion russa d’Ucraïna. Pendent l’interrogatòri, Pablo González foguèt acusat d’èsser “pròrús”, li reprochèron d’aver trabalhat per Gara e d’aver una carta de crèdit de la banca basca Laboral Kutxa. Foguèt expulsat d’Ucraïna.
 
Segon Público, mentre que González èra detengut, d’agents de l’intelligéncia espanhòla anèron al domicili del jornalista per interrogar sa familha e verificar s’èra vertadièrament partisan de Russia. A mai, los agents l’avertiguèron que l’avián acusat de trabalhar a Gara, en tot assegurar qu’èra “un mèdia prò-ETA e subvencionat per Russia”. A mai, tanben l’acusèron de “passar d’informacion a Russia”.
 
Tanlèu quitar Ucraïna, lo jornalista basco tornèt en Bascoat. Mas quand comencèt l’invasion russa, se gandiguèt a Polonha per trabalhar. Dins la nuèch del 27 al 28 de febrièr, la polícia polonesa l’arrestèt.
 
Lo govèrn basco assegura qu’es interessat per l’afar. Lo grop politic EH Bildu a demandat d’informacion als parlaments espanhòl e europèu, e Esquèrra Unida a demandat al Ministèri dels Afars Estrangièrs espanhòl qu’intervenguèsse. Plusors jornalistas se planhon del comportament de las autoritats espanhòlas.
 
 
Lo secutament de la premsa basca
 
Gara es un quotidian basco, que subreviu malgrat la persecucion. La justícia espanhòla faguèt pagar al quotidian basco tot lo deute que l’ancian jornal Egin aviá amb la Seguretat Sociala espanhòla. Egin foguèt victima de la persecucion politica de l’estat contra l’esquèrra basquista e li reclamavan un deute de tres milions d’èuros. La còla de Gara poguèt pagar aquesta soma arunan gràcias al sosten de milièrs de personas mas cap d’ajuda institucionala.
 
En 1998, la justícia espanhòla tampèt Egin e ne detenguèt qualques responsables. En 2009, la Cort Suprèma espanhòla daissèt sens efièch lo barrament d’Egin, mas lo quotidian poguèt pas èsser editat tornarmai e mai se li reclamèt un deute enòrme amb la Seguretat Sociala. La justícia espanhòla a fach pagar aquel deute al jornal Gara amb un argument un pauc escur: “la succession ideologica d’entrepresa”.
 
Per poder pagar aquel deute e subreviure, la còla de Gara a organizat aquestes ans d’eveniments solidaris e una campanha d’abonaments que li an respondut environ 10 000 ciutadans.
 
Gara (en basco Sèm) es un quotidian en basco e castelhan que ten 120 salariats e fa trabalhar d’autres 200 professionals.
 
 

abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Delbòsc
5.

#4 Venètz de trobar una famosa mina de parpèlas d'agaça. Encara que d'èsser incapable de comprene las causas dins lo contèxte, per qualqu'un qu'es supausat èsser un romancièr, es un bricon curiós.
Es pas complicat d'observar que tot çò que pòt devesir los estats occidentals, es lo jòc de Potin. L'unanimitat dins cada estat - aicí l'Espanha - es çò que fariá páur a Potin, perqué li daissariá pas plaça per jogar. Lo motiu ideologic, nacionalismes, gilets jaunes, França Somesa, Blacks Blocks, etc, es pas lo tòrt o lo rason que compta per el. Disi pas qu'aja pas de preferéncias ideologicas.

  • 3
  • 2
Franc Bardòu
4.

#2 Se gon vos, "lo nacionalisme basc" a vocacion a "fotre la mèrda en Occident" ?

Vertat es que "lo nacionalisme", dins son costat escur, fot la mèrda per definicion.

Mas a mon punt de vista, en Euskadi, lo nacionalisme castelhan a mailèu vocacion a fotre la mèrda, l'exacta meteissa mèrda que la combat lo nacionalisme basc.

Fin finala, tot depend çò qu'entendèm per "mèrda". La volontat de superar, inferiorizar e, pièger encara, esfaçar un pòble (definit per sa lenga) es merdissimament la mèrda. E vertat es que lo fait d'un nacionalisme.

#3 Non sabi pas ont se tròba *Occitània, nimai Aquitània ; dins sa fòrma populara, Aquitania se ditz Guiana, et en francés "Guyennne". Estant son pauc de popularitat, lo concèpte territorial non se pòt dire que d'un biais sabent, Occitania. Es lo punt de vista de l'Academia Occitana.

  • 2
  • 1
Delbòsc
3.

Pròrus ? Una sumienada ?
Vertat es que tot lo grop eretièr de Robèrt Lafont fa tot çò que pòt per alunhar la lenga occitanista (ensenhada dins las calandretas e las escòlas bilingüas) de la lenga occitana.
A partir de 1980-85, vegèron sortir l'òrre Occitània, a la plaça de Occitania tal coma escriviá Alibèrt (los tèxtes de sa ploma), l'interpretacion d'un lingüista mediòcre, mès un publicitari de tria, del Tresaur del Felibritge. En provençal dison "lou ravi" (accent tonic sus la primièra sillaba), mès Lafont e los autres vegèron pas res.

  • 6
  • 22
Delbòsc
2.

Un afar estranh. Vertat es que los russes son capables de subvencionar tot çò que, dins lor esperit, es capable de fotre la mèrda en Occident, quitament lo nacionalisme basc. Mès, es l'ocasion de dire que l'ideologia potiniana, tipicament russa, denèga las etnicitats, causís sistematicament los estats contra los pòbles. Cossí que siá, amai Gara foguèsse subvencionat per la Russia per fotre la mèrda en Espanha, çò que podèm pas verificar, aquò ditz pas res de las opinions d'aquel jornalista o de sos objectius professionals. Probable que l'òrre imperialisme espanhòl ne faguèt una de mai, ambe l'ajuda del govèrn polonés. E coma vegèrem a l'ocasion de la declaracion d'independéncia catalana, los estats an format un sindicat de defensa mutuala.

  • 10
  • 1
Prisme
1.

Vertat que s'esperam articles sus la premsa occitana, vam poder esperar ua pausa!
Redactors potenciaus, que n'avem un sarròt en los comentaris de Jornalet çaquelà, MDR.

  • 8
  • 18

Escriu un comentari sus aqueste article