Divendres al ser, se teniá la partida d’atribucion del trofèu de Campion del Monde dels Clubs. Lo ganhaire de la NRL, Stourm Melbourne, venguèt raubar lo títol als campions de la Super-Liga, los Rinòs de Leeds dins un estadi comol a fet: 18-14.
 
Dimenge de vèspre, lo temps èra siberian a Sant Estève e lo vent bufava a debanar los buòus e a descoetar los ases . Còp de freg tanben per Carcassona que dominèt mas saupièt pas marcar alara que los Dragonets profitèron de cada escasença per faire parlar las cambas de fuòc de sas individualitats: a la sortida, 26-14 pels catalans.
 
Lesinhan joguèt a la lèbre e a la tartuga amb Tolosa per s’impausar fin finala 24-22.
 
Limós agèt pas cap de pietat per Lescura qu’a pas res mai a esperar de la sason aprèp son eliminacion de la Copa per Tolosa dimècres al ser (42-8). Victòria larja dels limosencs: 60-18.
 
Avinhon se faguèt surprendre a Vilanòva pels Leupards e pèrd 30-16 aprèp aver menat 14-4 a la pausa!
 
Dissabte, Avinhon reçauprà Lescura alara que Pià anirà rendre vesita a Tolosa.
 
Dimenge, Limós reçaup los Dragonets a l’Agulha sul còp de 3 oras del vèspre, alara qu’a 4 e mièja a Domèc, grand derbi entre l’ASCarcassona e lo FCLesinhan. Al micrò de Ràdio-Lenga d’Òc-Narbona, Joan-Francés Albèrt (l’un dels dos entraïnaires dels campions de França) anóncia una formacion carcassonesa mobilizada e que vòl prene fòrt e mòrt lo revenge de l’anar.
 
En Super-Liga, los Dracs èran partits a Castleford amb las favors dels pronostics mas deguèron s’acontentar del punt de l’egalitat: 17 pertot.
 
Dissabte a 6 oras del vèspre, los Dracs reçaupràn a Brutús l’equipa de Wakefield menada pel novèl responsable de l’equipa de França, Ricard Agar. Serà per el l’escasença de veire amb son adjunt, Jiròni Guisset, lo programa de preparacion de l’equipa de França d’aicí la Copa del Monde!
 
Wakefield ven de pèrdre a l’ostal fàcia al cap-de-fila Huddersfield: 16-18. Se volètz seguir los Dracs a Wigan lo divendres 8 de març, seriá ora de reservar vòstra plaça dins l’avion privat del club.
 
A Carcassona, la dimenjada tretzista se dobrirà dissabte pel Trofèu dels As de XIII-fautuèlh que se debanarà dins la sala del Dòme amb la partida Estadi Tolzan-Montalban (14h) e lo revenge de la finala del campionat de frança Caurs-Dracs catalans (16h).
 
D’aprèp Silvan Crismanovitch, responsable de l’equipa de França de la disciplina, los espectators assistiràn a un vertadièr espectacle e afrontament esportiu e doblidaràn lèu-lèu qu’es una disciplina especifica pels andicapats.
 
 
 
 
Alan Roch