Dobrirem aquesta cronica en metent endavant lo messatge de sosten e de solidaritat mandat per la federacion francesa de XIII a son omològa ucraïnesa.

Catalans solidaris e euforics
 
Del costat esportiu, lo desplaçament dels Dragons a Warrington s’anonciava pas jols melhors auspicis sus una pelena ont los catalans avián pas ganhat dempuèi 2011. Entre malauts e suspenduts, nòu jogaires èran absents. S’i ajustèt Fouad Yaha, nafrat a l’escalfament. Es doncas una formacion amb una composicion inedita que dintrava sus la pelena. Los Sang e Aur anavan defendre amb un nhac segur. Drinkwater metiá sus orbita Matt Whitley per l’ensag que lo mesclanha transformava. Los Lops egalizèron a 6-6 abans la pausa. Pauc a pauc, los catalans prenguèron la direccion de las operacions. May, posicionat a l’arrièr, recuperava totas las palmas. Una candela mal contrarotlada e es Arthur Romano que marcava. Un pichon còp de pè dins l’esquina de la defensa anglesa e Pearce puntava l’ensag. Mickaël Goudemand jogava al pè e recuperava la palma per marcar just sus la linha. Coma Drinkwater ensacava las transformacions, los catalans tenián un avantatge de 24-6 a un quart d’ora del tèrme. Las doas esquipas jògan a 12 aprèp de cartons jaunes. Las darrièras 5 minutas permetèron als angleses de trapar lo trauc sus l’ala dreita pel caçaire d’ensag Josh Charnley qu’anava dos còps darrièr la linha. Mas èra tròp tard… Victòria istorica dels Dragons: 24-18.
 
De Dragons que reçaupràn aqueste dissabte 12 a Brutus, a 6h e mièja del vèspre, la formacion de Wigan que jogava a Tolosa aqueste dissabte.
 
 
TO: per un punt…
 
Los tolosans avián mostrat lor progression amb la recepcion de Warrington. Enaucèron encara lo nivèl aqueste dissabte amb la venguda de Wigan. Joguèron sens crenta e menèron 18-10 a la pausa: ensages d’Armitage, Stefani e Gigòt; doas transformacions d’Hankison; tombats de Gigòt e Pelissièr. Dins lo segond temps, los Blau e Blanc ajustèron un ensag per Russell e un segond per Armitage, transformat per Hankinson. Atal, a l’ora de jòc, los occitans menavan 28-16. Mas dins lo darrièr quart d’ora, Wigan traucava dos còps la defensa locala e ajustava lo tombat fatal a la darrièra minuta per ganhar 29-28. Divendres, Tolosa jogarà a Wakefield (una formacion batuda sus sa pelena per Leeds aqueste dijòus: 18-34) abans de reçaupre lo campion Saint Helens lo dissabte 19, un campion sens pietat cò d’Hull KR: 42-8. Aqueste dimenge, Huddersfield fa viure l’infèrn als Diables Roges de Salford: 34-2 e Castleford bat Hull FC: 33-26.
 
 
Elèit 1: mesa a jorn profeitabla a Albi e Avinhon
 
Aqueste dimenge, se jogavan doas partidas remesas del campionat d’Elèit 1. Victòrias de las esquipas que se desplaçavan: Albi a St Gaudenç: 40-10 e Avinhon a Tolosa: 22-10.
 
Al programa dels 12 e 13 de febrièr, se jogaràn las partidas Tolosa-Carcassona, Avinhon-Limós, Albi-Dragonets e, al Molin, una oposicion en verd e blanc entre Lesinhan e Vilanòva.
 
En Elèit 2, bon dimenge pels catalans: Pià domina Vilafranca 42-12 e larga victòria de Baó fàcia a Selon: 50-12.
 
 
Las Blavas en Anglatèrra
 
L’esquipa de França femenina anirà rescontrar las anglesas lo 18 de junh a Warrington en dobertura de la partida entre Anglatèrra e la seleccion dels estrangièrs. Los “catalans” Sam Tomkins e Tom Davies son preseleccionats per aquela partida.
 
Per çò qu’es de l’esquipa masculina, avèm pas, per ara, cap d’idèa de lor programa de preparacion de la competicion mondiala.
 
 
Represa en Austràlia
 
Aqueste dijòus 10 de març, lo campionat NRL reprendrà. Lo campion Penrith reçauprà Manly. Seguiràn las partidas Canberra-Làmias e Bròncos-Lapinons (divendres 11), Polets-Newcastle, Combatents NZ-Dragons, Tigres-Melbourne (dissabte 12) e Anguialas-Titans, e Vaquièrs-Dògols (dimenge 13). BeInSport prepausarà una partida cada jorn, del dijòus al dimenge.
 
Del temps, los Dalfins de Brisbane recrutan en vista de lor dintrada dins la competicion en 2023.
 
 
 
 
Alan Roch