Bandièra01 1180x150: La Passem

Actualitats

Internacional

Guèrra en Ucraïna: environ 20 000 estrangièrs volontaris per se batre contra Russia

Lo president ucraïnés Volodimir Zelenski aviá anonciat devèrs la fin de febrièr la creacion d’una “legion internacionala” de combatents estrangièrs per ajudar a rebutar l’invasion russa, çò rapòrta Sud-Ouest.

Tèxte legit

Environ 20 000 combatents estrangièrs se son portats volontaris per ajudar Ucraïna a se batre contra Russia, çò declarèt lo ministre ucraïnés dels afars estrangièrs, Dmitro Kuleba, aqueste dimenge 6 de març. “Venon principalament de païses europèus”, çò apondèt a la television estatsunidenca CNN. “Quand las gents vegèron que los ucraïneses se batián, que baissavan pas los braces, aquò los a encoratjats a jónher lo combat”, çò precisèt encara.
 
En tot saludar lo coratge e l’ajuda d’aqueles combatents, lo cap de la diplomacia ucraïnesa jutgèt pasmens que seriá “mai important” d’obténer una assisténcia “politica, economica e militara” de la rèsta del Mond, sustot “per la defensa aeriana”.
 
 
La creacion d’una “legion internacionala”
 
Lo president ucraïnés Volodimir Zelenski anoncièt en fin de febrièr la creacion d’una “legion internacionala” de combatents estrangièrs per l’ajudar a rebutar l’invasion russa. Los volontaris son estats convidats a s’adreiçar a las ambaissadas d’Ucraïna dins lors païses respectius.
 
De notar que Danemarc, coma la ministra britanica dels afars estrangièrs, Liz Truss, donèron l’autorizacion de se gandir en Ucraïna a lors ciutadans per aquel motiu. Mas lo cap d’Estat-Major de l’armada britanica, l’amiral Tony Radakin, qualifiquèt aquel engatjament de s’anar batre en Ucraïna d’“illegal e inutil”.
 
 
 
 


abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Daniel Codina Padrós Salt
8.

Deien que havien tancat la central nuclear de Txernòbil i continua funcionant.

  • 0
  • 0
Franc Bardòu
7.

#6 Las Brigadas Internacionalas combatèron lo Franquisme e sos putanhièrs d'aligats, los nazis e los fascistas que, mercés a lor aviacion que sosteniá l'orror militària d'ultradrèita, experimentavan la Blitzkrieg en Andalosia, Castilha, Asturia, Euskadi, Aragon e Païses Catalans, abans qu'Alamanha envasiguèsse Polonha.

  • 5
  • 1
Joan-Pèire Soulié
6.

#3 e las Brigadas Internacionalas que combatèron lo franquisme .

  • 5
  • 1
Mai Republica es abordida mai legiférís !
5.

Aièrc AEIA (Agença internacionala de l’energia atomica) aviá dich que los sistèms qu’autrejava de contrarotlar a distencia las materias nuclearis de la centrala de Tchernobil transmetian cap pus de donadas.

Auèi L’entrepresa nacionala de produccion d’energia d’Ucraina : Energatom, nos dis que l’alimentacion electric de la centrala es copada en razon dels combats.

Energatom ten de rementar qu’es òps de refrescar de contunh los combustibles que damoran a Tchernobil, çò qu’es possible sonque ambe d’electricitat qu’activan las pompas d’infrigidar.

Energatom pensa que lo risc de liberacion de substanças radioactivas dins l’environament es possible e apon que l’aura pòt trastolrar nivòls radioactius dins d’autras regions d’Ucraina meteis, de Russia de Biélorussia e d’Europa.

  • 3
  • 2
Emmanuèl Isopet
4.

#1 Semblas far una granda diferéncia de valor (morala) entre un mercenari e un volontari. Te someti donc aquesta informacion de l'AFP datada del 2 de març: " Quatorze légionnaires ukrainiens ont été interpellés mardi à Paris dans un bus partant pour la Pologne, dans lequel d’autres passagers partaient vraisemblablement combattre en Ukraine, a-t-on appris mercredi de sources militaires. Neuf de ces légionnaires bénéficiaient d’une permission qui ne leur permettait toutefois pas de quitter le territoire, quand les cinq autres se trouvaient en situation d’« absence irrégulière »."
Questions: aquestes 14 ukraïnians son de volontaris o de mercenaris? son volontaris per se batre per França o per Ucraïna? Son de mercenaris per França o per Ucraïna?
Cossi destrias entre volontari e mercenari? Las Brigadas internacionalas en Espanha? Orwell? èras volontaris o mercenaris? Lo Che, èra volontari o mercenari? e José Aboulker? e Addi Bâ? e Maurice Bayrou?

  • 17
  • 0

Escriu un comentari sus aqueste article