Bandièra01 1180x150: Comuna de Tolosa

Actualitats

InternacionalPolitica

Tot lo sobeiranisme còrs s’amassa dins un collectiu

Los quatre partits corsistas, sindicats, estudiants, associacions de presonièrs, l’universitat e d’autras associacions cridan a una manifestacion deman a Bastia

Tèxte legit

Los quatre partits sobeiranistas còrses, los sindicats d’estudiants, totas las associacions de presonièrs, de sindicats, l'Universitat de Corsega e d’autras entitats an decidit de s’amassar dins un collectiu per coordenar las “accions militantas” avenidoiras en seguida de la temptativa d’assassinat contra Yvan Colonna dins la preson d’Arle. Colonna se tròba dins lo còma dins una situacion fòrça grèva.
 
 
Las revendicacions
 
La primièra accion d’aquel collectiu es la crida a una manifestacion de massa deman a Bastia per reclamar la vertat sus la temptativa d’assassinat de Colonna, la libertat dels presonièrs politics e la reconeissença del pòble còrs. Dins aquel sens, exigisson tanben la dobertura d’un procès de negociacion public orientat devèrs una solucion politica globala de la question còrsa.
 
 
Protegir los joves de la violénca policièra extrèma
 
Lo collectiu assegura que s’es constituit tanben amb la tòca de “daissar pas los joves còrses expausats a una repression e violéncia policièra extrèma”. Aquesta setmana, i a agut de rambalhs en divèrses ponches de l’illa. Dins la capitala, Aiacciu, qualques manifestants an assautat lo palais de justícia.
 
 
Simeoni o reafirma a Castex, que cedís sus l’estatut de detenguts particularament senhalats
 
Dijòus passat, lo primièr ministre francés, Jean Castex, telefonèt al president còrs, Gilles Simeoni. Dins la convèrsa, Simeoni reafirmèt l’exigéncia de la vertat sus Yvan Colonna, lo retirament immediat de l’estatut de detenguts particularament senhalats (DPS) als autres presonièrs politics còrses e un engatjament public sus l’acercament dels presonièrs de lors familhas e la question còrsa. Divendres, lo govèrn francés levèt l’estatut de DPS als presonièrs Alain Ferrandi e Pierre Alessandri.

 

 
 
 
 


abonar los amics de Jornalet

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
8.

#7 Quand mon avi, al "maquis Morange", en operacion de resisténcia a l'ocupacion nazi, crebava la pèl d'un alamand o d'un francés veichista, pensi que se fotiá ben pro de saber çò que ne pensarián la lors famílias. E passava al uèlhs de las autoritats petainista per un "tarrorista", mentre qu'èra un eròi de la resisténcia a l'ocupacion del sieu país. Es plan possible que los basques, los còrses e los irlandeses, per exemple, vejan los "terroristas empreisonats" que ieu vesi mon avi, ni mai ni mens. Amb o sense estat, un territòri ocupat es o demòra, tant que non es deliurat de l'ocupant.

Me diretz benlèu que comparar lo nazisme e lo francisme es desplaçat e excessiu. Los nazis èran de rasclanhas qu'o volián superar tot en Euròpa (coma Napoleone) e qu'an assajat d'eliminar los Ebrèus — uorsament sense i capitar ! Mentre que los francistas, eles, son d'àngels eggalitaristas que son pervengut a eliminar mon pòble e que s'esfòrçan d'eliminar tzanben los basques, los còrses, los bretons, los alamands d'Alsàcia, los flamencs, los arpitans e los catalans, sense parlar dels pòbles ultramarins. Sonque aquò ? Non es eliminat, mon pòble d'òc ? Ont es ? L'avètz vist, vosautres ?

  • 13
  • 7
Riucròs
7.

Aquel afar poiriá èsser l'istòria patetica de dos terroristas que s'entretuan, e pas mai.
Mas, amb emocion, pensam a la familha del prefècte occitan Claude Erignac, assassinat per res.
Lor dòl n'acaba pas.

  • 8
  • 24
PINZUTU
6.

Totes aqueles poces roges dejos 1, 2 , 4, 5 son de militants occitanistas, amics de "Jornalet" ? quina tristessa ! o pòdi pas creire !
OSCA UCRAINA, CORSEGA, CATALONHA ET OCCITANIA LIBRES !

  • 16
  • 7
L\'avocat
5.

#3
Se sap pas exactament qui a tuat lo prefècte. D'unes o sabon mas vòlon pas parlar. Colonna benlèu o sap, mas o vòl pas dire. Benlèu es el. Ne cal pas escartar la possibilitat.
Ara, l'Estat francés aviá besonh d'un assassin e faguèt menar l'enquèsta a la lèsta.
De tot biais, quitament un assassin a de dreches. E sustot d'èsser pas assassinat en preson.
La pena de mòrt es estada abolida o pas ?
Quand al mond que vòl pas parlar, que se parle pas d'omerta : l'Estat francés la sap practicar tanben quand li conven.

  • 11
  • 8
PINZUTU
4.

#3 Ieu tanben, ara foncionari retirat de l'estat francés, visquèri 5 ans (1984-1986 et 1988 -1990) a Bastia (Cambra Regionala dels Comptes) e Aiaccu (Direccion Regionala de l'Agricultura et de la Selva).
Tots los còrses ( nationalistas, independentistas, sindicalistas d'obediéncia exagonala o nationalista (STC), militants-Max SIMEONI, Iviu STELLA eca...m'an defensat eficacament contra la volontat de representants de l'administracion francesa de me far tornar sul "Continent".
Jamai auriá vist aquò en França.
Un record especial e admiratiu per l'ambaissador ( de l'estat francés) Petru Rossi, ara mòrt, militant nacionalista exemplari.

  • 12
  • 5

Escriu un comentari sus aqueste article