Estonament amb lo populisme del Movement Cinc Estelas del comic Beppe Grillo, remonta de l’èx-primièr ministre conservator Silvio Berlusconi, revirada del tecnocrata Mario Monti e pauc de vam per l’esquèrra de Bersani. Vaquí lo resumit dels resultats electorals en Itàlia, ont cap de partit a pas aconseguit una majoritat clara per governar; e ja se parla d’una repeticion de las eleccions.

Los darrièrs resultats publicats per la RAI, aperaquí a onze oras del ser, indican que la coalicion de centresquèrra de Pier Luigi Bersani auriá ganhat la Cambra dels Deputats en vòtes e sètis, mas lo centredrecha de Silvio Berlusconi auriá aconseguit mai de sètis dins lo Senat, e mai siá leugièrament en dejós de Bersani en percentatge de vòtes. A 80% de l’escrutini, la RAI donava a Bersani 31,7% dels vòtes al Senat e 29,6% a la Cambra dels Deputats, e a Berlusconi 30,7% e 28,7%, respectivament. L’estonament de las eleccions es lo saut del populista Beppe Grillo, que pòt aver 23,8% dels vòtes per la Cambra e 25,9% dels vòtes pel Senat.
 
 
Contents en cò de Berlusconi
 
Dins la sedença de la coalicion de centredrecha de Berlusconi, l’ambient èra de satisfaccion, segon lo Corriere della Sera dins son edicion numerica. Lo candidat per primièr ministre del Pòble de la Libertat, Angelino Alfano, a avalorat los resultats coma extraordinaris e a mercejat l’èx-primièr ministre Silvio Berlusconi —qu’acceptèt de donar la direccion a Alfano en escambi d’optar per èsser ministre de l’Economia—. Lo centredrecha a avalorat la resurreccion de Berlusconi —apartat per Brussèlas coma primièr ministre a causa dels afars de corrupcion e remplaçat per Mario Monti— coma un novèl “eveniment memorable” del Cavaliere.
 
 
D’eventualas nòvas eleccions, çò a dich l’esquèrra
 
Entre las esquèrras, Bersani a evitat de far de comentaris pendent la nuèch electorala, mas lo sieu segond, Enrico Letta, a assegurat que i poiriá tornar aver d’eleccions “plan lèu” en Itàlia. La coalicion de las esquèrras —que, se los darrièrs resultats se confirman, ten la victòria per un marge sarrat a la Cambra dels Deputats mas pèrd en nombre de sètis al Senat— a rebaissat l’optimisme que i aviá al començament de la serada, quand los sondatges a pè d’urna pronosticavan un resultat fòrça mens sarrat.
 
 
Lo populisme de Grillo
 
Un dels resultats mai estonants en Itàlia es estat lo de Beppe Grillo, qu’a despassat de longa lo plafon de 20% dels vòtes tant al Senat coma a la Cambra dels Deputats. “Es meravilhós, en tres ans sèm venguts lo partit mai grand d’Itàlia”, çò a dich Grillo, qu’a la diferéncia de Bersani e Berlusconi, dirigís pas una coalicion de formacions. “Es estat una aventura meravilhosa e farem tot çò qu’avèm promés pendent la campanha electorala”, çò a apondut lo cap del Movement Cinc Estelas. Segon Grillo, los resultats demòstran que los partits tradicionals an mal capitat.
 
 
Revirada de Monti
 
Las eleccions en Itàlia son tanben una revirada fòrça importanta pel fins ara primièr ministre, lo tecnocrata Mario Monti, qu’a aconseguit 9,3% dels vòtes al Senat e 10,8% dels vòtes a la Cambra dels Deputats. Monti, qu’es comparegut davant los mèdias lo quite ser de l’escrutini, a assegurat que lo populisme a ganhat. Pasmens Monti a afortit tanben que los resultats son satisfasents en prenent en compte que la coalicion que dirigissiá se creèt solament fa cinquanta jorns e qu’èra completament nòva.

	LOS RESULTATS Cambra dels deputats Bersani: 340 deputats Berlusconi: 124 deputats Movement 5 estelas de Grillo: 108 deputats Mario Monti: 45 escons   Senat Bersani: 113 senators Berlusconi: 116 senators Movement 5 estelas de Grillo: 54 senators Mario Monti: 18 senators

_____
Los resultats oficials