De calandrons de Carcassona nos contan lor descobèrta de grandas femnas de l’istòria gràcias a la literatura. Leo B, Leo D, de CM1, nos rapòrtan lo jòc de literatura fach en classa e nos parlan de Cleopatra del temps que Robin e Gabriel, tanben de CM1, nos parlan de femnas que cambièron lo Mond.
Cleopatra
Ongan fasèm un jòc de literatura! Avèm dètz e uèit libròts e a cada còp i a un questionari! Aqueles dètz e uèit libres parlan de dètz e uèit femnas que faguèron dins l’istòria de causas puslèu extraordinàrias. Vos anam parlar de la Cleopatra! Foguèt la darrièra reina d’Egipte. Son istòria comença en 69 abans JC dins la vila d’Alexandria dins un palais magnific! La Cleopatra, e mai quand èra fòrça jove, faguèt lèu véser a totes la sieuna intelligéncia e mai anèsse pas a l’escòla coma nosautres! Per ela, sos professors venián al palais per li ensenhar!
De femnas que cambièron lo Mond
Dins la tièra de libres i a pas que de femnas! Amb aquel jòc de literatura volèm faire véser que dins l’istòria i agèt tanben de femnas extraodinàrias e que los grands personatges son pas totjorn d’òmes! E mai dins los temps ancians de l’Antiquitat, de femnas capitèron de s’illustrar de de faire véser totas lors competéncias! De Cleopatra a Nefertiti en passant per Rosa Parks, Alienòr d’Aquitània, Maria Antonieta, Coco Chanel, Marie Curie e plan mai.... cèrtas femnas cambièron lo Mond!
Leo B, Leo D , Robin e Gabriel
CM1
Jornalet a l'escòla
Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.
Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.
Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Oc , tornar descobrir la vita vertadèira de mantunas hemnas , amagadas , oblidadas dinc adara, per l'espiar d'una societat inegalitaria, es mei que necessari . Osca !
Mès tanben tornar considerar lo ròtle minorizat e amagat de las hemnas en la vita vitanta , pendant sègles e sègles , shens glòria , mès damb coratge , per assegurar la susvita de tots per lo trabalh e las obras de cada jorn, La mitat mascla de la societat que se crei tan gloriosa , qué auré hèit , qué haré shens tot aqueth trabalh ? shens totas aqueras coneishenças e saber-hèser de las hemnas ?
Per s'avisar qu' una societat on la mitat es esglachada , ne patis tota , quitament los que cresen ne héser lor pro.
E tanben en l'istòria e la literatura, n'oblidar pas los persnatges "segonds" , hemnas -ombras que digun ne vei pas gaire mès .... indispensablas ! Coma en la vita vitanta ! Qué seré l'Ulisses shens Atena , shens Penelòpa, shens Nausicaa ?
Dirai pas jamai pron coma precegi lo biais de dubrir los esperits als calandrons. Tot lo trabalh qu'es fach favoriza la bastison d'òmes e de femnas responsables, capables d'esperit critic e afogats de conéissenças. Òsca a la còla pedagogica !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari