Los afogats d’espòrts collectius nòtan totjorn plan coma cal las datas dels dèrbis: aqueles rescontres entre partidas de vilas vesinas. L’ancian cònse de Lesinhan e ancian capitani de l’esquipa de França de XIII, Miquèl Maïque, aimava de dire: “Un títol, es plan, mas l’important dins l’annada es de batre Carcassona.”.

Aquelas partidas fan encara mai parlar e desparlar que de costuma que pòdes trapar los sostens de l’esquipa advèrsa sus ton luòc de trabalh, o alara que fan partida de ta familha… E cada partida permet de remontar la mecanica dels tempses dempuèi l’enfança cap a l’avenidor, los jogaires que de còps an practicat dins los 2 clubs van metre mai d’intensitat a voler batre los collègas; de còps, la temperatura monta e la saca de carpans s’entredobrís o se dobrís; de segur, la partida es apuèi a tornar faire en paraula a l’estanquet…
 
Per çò qu’es dels dèrbis, aquesta fin de setmana sèm estats servits…
   
E ara, esperam en tresfosissent la partida Carcassona-Limós del dimenge 10 d’abril. De mai, i aurà una brava taulejada abans lo rescontre. Francament, pensatz que se passa quicòm en França aqueste dimenge 10 d’abril de mai important que lo dèrbi Carcassona-Limós de XIII amb la primièra plaça del classament en jòc?
 
 
Elèit 1: los Dragonets batuts a Tolosa
 
Se, logicament, dissabte, en marcant 9 ensages, Carcassona dominèt Vilanòva 50-18 e dimenge, Avinhon ganhèt fàcia a St Gaudenç 52-12, mai susprenenta es la desfaita dels Dragonets a Tolosa: 28-34; vertat que de quadres de la formacion jogavan amb los Dracs en Cup.
 
Aqueste dissabte, los Dragonets reçaupràn Carcassona a Brutus dins la vesprada. Son tanben programadas las partidas Limós-Tolosa, St Gaudenç-Vilanòva, e un decisiu Avinhon-Albi per l’atribucion d’una plaça de qualificat.
 
 
Cup: Dragons-St Helens en quart de Cup
 
En 8n de Cup, los Dragons recebián los primadièrs del Championship: Featherstone; los angleses marquèron los primièrs e tenguèron còp fins a l’ora de jòc, abans de plegar (27-14). Meteis sòrt per las autras formacions del Championship: Sheffield batut per Hull FC (12-58), Whitehaven per St Helens(4-46), Leigh fàcia a Hull KR (24-18) e Barrow batut per Huddersfield: 16-30.
 
Dins los afrontaments entre formacions de Superliga, Wigan eliminèt Salford 20-0, Castleford anèt batre Leeds 40-16 e Wakefield ganhèt a Warrington: 16-12.
 
Los quarts de finala se tendràn la dimenjada de l’8 al 10 d’abril. Los Dragons Catalans son plan servits: reçaupràn a Brutus St Helens, aquò promet!
 
 
NRL: los campions, sols amb 3 victòrias
 
Dissabte, Canberra menat 22-0 pels Titans just abans la pausa fasiá son retard dins lo segond temps per ganhar 24-22. A Melbourne, calguèt passar pel punt en aur e la victòria anèt a Parramatta 28-24 (ensag marcat en recuperant una pauma de tombat que rebombèt sul pal! ). Sols, los campions de Penrith an ganhat lors primièras tres partidas.
 
 
Lo rendètz-vos de la joinesa tretzista
 
Aqueste dimenge 3 d’abril, l’Acadèmia Esportiva de Carcassona 13 organiza al pè de Ciutat lo Challenge Grégoire, lo grand recampament de las escòlas dels joves de XIII que remosarà U7, U9, U11 e U13.
 
 
 
 
Alan Roch