Bandièra01 1180x150: Comuna de Tolosa

Actualitats

Brageiragués: produire de gas amb de rèstas de marc de rasim

La societat marselhesa CVE a ja bastit 6 digestors anaerobics coma lo del Bruèlh dins tot l’estat francés

| Marc Bertrand / Radio France

Tèxte legit

En Brageiragués, un digestor anaerobic produtz de gas de vila amb de rèstas de marc de rasim. Es un enòrme dòma amb de canèls de pertot, que fonciona un pauc coma un estomac de vaca. A Sant Antòni del Bruèlh, lo noven digestor del departament se dobriguèt fa sièis meses.
 
Lo digestor es esplechat per una entrepresa marselhesa especializada, CVE, que construtz d’installacions coma aquesta pertot dins l’estat francés; aquelas installacions poirián èsser una solucion al còst creissent del gas, çò rapòrta France Bleu.
 
L’esplech “manja” 17 000 tonas de degalhs organics per an. De marc de rasim d’una destillariá de Gironda, de fibras de papetariá, de graissas de pastissariá, tot aquò recampat en mens d’una ora de camion. Tot es digerit, amb de bacterias dins de tinas, e aquò produtz de gas de vila. Lo gas es injectat dirèctament sus la ret GRDF, per un equivalent del consum de 1800 foguièrs per an. Sèm encara luènh de l’independéncia energetica de Peiregòrd, mas en teoria, es possible.
 
En plen dins la guèrra en Ucraïna, los prèses del gas riscan d’aumentar per longtemps. E segon Hervé Lucas, lo copresident de CVE, i auriá pro de degalhs a valorizar en Dordonha per produire una part importanta del gas consumat en Peiregòrd: “Tot lo gas produch aquí es de gas qu’importam pas dels païses estrangièrs. Deman, farem rotlar los buses gràcias a las sòbras de iaort, gràcias a tot çò qu’es demorat dins lo refregidor. Se se valorizava corrèctament nòstres degalhs, se poiriá produire lo 30 a 40% de nòstres besonhs de gas en Euròpa”.
 
 
Un projècte long a realizar
 
L’entrepresa a ja bastit 6 digestors coma lo del Bruèlh dins tot l’estat francés. Espèra de ne  construire encara 60 d’aquí a 2030. Lo problèma demòra qu’aqueles projèctes son longs a realizar. Dètz ans, sonque per bastir lo digestor anaerobic del Bruèlh. E subretot es un gas que còsta mai car que lo gas rus, e mai son prètz aumente d’aqueste moment sul mercat internacional. D’aquesta passa en Peiregòrd, almens cinc projèctes son en cors. La cambra d’agricultura estima que i aurà almens 14 digestors actius dins lo departament en 2023.

 
 
 
 


abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article