La factura de l’electricitat de l’SNCF poiriá pojar de plusors desenas a plusors centenas de milions d’èuros, çò rapòrta La Tribune. La societat ferroviària francesa es lo principal consomaire d’electricitat de l’estat e la que mai patís l’inflacion dels prèses de l’energia. Sa filiala SNCF Voyageurs, encargada del transpòrt de viatjaires, representa ela sola lo 10% del consum industrial de tota França,  çò es entre l’1 e lo 2% del consum total francés.
 
Segons Christophe Fanichet, director general de SNCF Voyageurs, lo consum previst per l’an 2022 es cobèrt al 95% amb una politica de crompa amb dos o tres ans d’anticipacion. Mas lo 5% restant poiriá costar “qualques desenas de milions d’èuros”.
 
Fàcia a 2023, la factura poiriá aumentar fòrça mai significativament. Lo còst addicional poiriá passar alavetz de qualques desenas a de centenas de milions d’èuros, compte tengut dels prèses actuals de l’energia. Per tant, se considèra ara una revision de l’estrategia de crompa per determinar lo melhor moment per completar la cobertura de 2023. L’afar se deuriá decidir dins la segonda mitat d’ongan.
 
Se son a chifrar d’autras estrategias per reduire lo consum d’electricitat sens aver de diminuir la velocitat dels trens. De tot biais, Fanichet assegura qu’aquesta inflacion se repercutirà pas sul prètz dels bilhets.