Bandièra01 capçalera  1180x150: Novestivada

Actualitats

Una cançon en catalan e occitan per dire de non als Jòcs Olimpics d’ivèrn dins los Pirenèus

Una còla d’artistas coneguts an participat a la cançon, escricha e compausada per Alidé Sans

Tèxte legit

Se presentèt ièr dimars lo videoclip de la cançon La terra per sembrar, escricha e compausada per la musiciana aranesa Alidé Sans. La cançon es interpretada en catalan e en occitan per una còla d’artistas que vòlon acompanhar la lucha contra la candidatura pels Jòcs Olimpics d’ivèrn previstes per l’an 2030 dins los Pirenèus catalans, araneses e aragoneses. S’agís d’una cançon plan positiva e optimista que revendica un país totjorn viu.
 
Lo projècte, bailejat per Alidé Sans, lo sostenon d’artistas plan coneguts dins los Païses Catalans e endacòm mai coma Liv Hallum, Núria Llobet, Mònica Roca, Ivan Caro, Clara Peya, Montse Castellà, Natxo Tarrés, Joina, Cesk Freixas, Mabel Flores, Titot, Pirat’s Sound Sistema, Gemma Polo e Xavi Sarrià, en mai de plan d’autras collaboracions.
 
Pel projècte per presentar una candidatura de Jòcs Olimpics d’ivèrn dins los Pirenèus en 2030 se son fòrça engatjats lo govèrn d’Aran e lo de la Generalitat de Catalonha que lo 24 de julhet farà un referendum per conéisser lo vejaire de la populacion. En Aran e dins las comarcas pirenencas del Principat de Catalonha se demandarà als ciutadans se vòlon que se presente la candidatura, del temps qu’als abitants d’autres parçans pertocats se demandarà se se vòlon engatjar pels Jòcs.
 
La contèsta d'aquel projècte, de part de la plataforma Stop Jòcs Olimpics, argumenta de rasons ecologicas, mas sustot se crenh una perpetuacion del modèl economic unic del torisme massís e de la consecutiva subresplecha del territòri que compòrta d’emplecs fòrça precaris, qu’es una de las causas màgers de la desoccitanizacion de la Val d’Aran.
 
Lo 15 de mai a miègjorn, es convocada una manifestacion a Puigcerdà jol lèma “Per de Pirenèus vius, arrestem los Jòcs d’ivèrn”, ont se revendica l’abandon de la candidatura mas tanben que los govèrns se metan al trabalh per prepausar als païses de montanha una alternativa reala.


 
fffff fffff
 Àudio:Alidé Sans nos conta la tòca de la cançon e convida a la manifestacion de Puigcerdà.

   
 
   


 
 


 
 
abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

carles països valencians
6.

des dels països valencians estem molt d'acord amb la campanya que fan els països catalans i països occitans, contra els jocs olimpics en els pirineus. Per cert, la cançò molt bonica. sempre avant!!!

els nostres paîsos units SOM FORTS

  • 6
  • 0
Tistet
5.

Plan lo bonjorn amics montanhòls,
Una escasença aitala per requinquilhar vòstre polit país risca de pas tornar d'un brieu.
Ieu disi aquò per rendre servici.
Val mai la mescla que l'endogamia.
Un cloquièr destrantalhat e dos borricòts estacats a costat de l'abeurador, aquò's finit.

Se cantan que canten, cantan pas per ieu.

  • 1
  • 4
Pitaluga
4.

Aquí de mond que son pas de ventabrens de la cançoneta. Veson ben qu'aquela mena "d'eveniments" son desastroses per nòstre mitan de vida*.
Per veire quora los cantaires de la chanson française nos faràn una cançon per explicar que los JO de París acceleraràn lo camin cap al desastre.

*Cal parlar del mitan de vida. Salvar la planèta a pas de sens per nosautres. La planèta, del climat, de la pollucion, de l'espleitacion destimborlada, se'n fot : ela nos subreviurà totjorn.

  • 4
  • 2
Lo Slam Gauchista
3.

#1 Mon bon Lachaud, René Dumont es defuntat e sebelit dempuèi bèl briu !

  • 6
  • 3
Cristina
2.

Una fòrça polida cançon, plena de vam.
Una cançon per contestar, per dire, per denonciar, e anticipar. Pensi qu'es un bon mejan.
Òsca per la realisacion qu'es una capitada.
Merita d'èsser ausida, compresa.
Cal trobar lo bon biais de poder viure al pais, sens gastar la vertadièra riquesa del luòc.
Segurament qu'es pas aisit...Cal soscar, s'acampar, escambiar...
Ieu disi : "mèfi de pas vendre son alma al diable", per ganhar mai !
Mas compreni qu'es pas gaujós de "tirar lo diable per la coa ! " (de tirassar lo merluç)
Bon astre a totes los que luchan per melhorar la societat e l'avenidor!

  • 8
  • 1

Escriu un comentari sus aqueste article