Lo govèrn d’Afganistan, entre las mans dels talibans, a emés un nòu òrdre qu’establís de puniments per las femnas que se cobririán pas la cara fòra de l’ostal, e recomanda l’usatge de la burqa, simbòl de la repression sociala pendent l’estapa que se concluguèt en 2001. A mai, ditz a las femnas que s’an pas res d’importanta a far, es melhor que demòren a l’ostal.
 
L’òrdre, qu’emana del principal dirigent taliban, Haibatullah Akhundzada, es estat divulgat pel Ministèri de la Propagacion de la Vertut e la Prevencion del Vici, responsable de susvelhar l’estricte compliment de lor interpretacion de la lei canonica de l’islam, dicha sharia.
 
Un pòrtavotz ministerial a explicat dins una conferéncia de premsa que las femnas se devon cobrir la cara en public, jos pena de preson per elas e per lors òmes “gardians”, es a dire lors marits o parents mascles dirèctes. Lo regim argumenta qu’aital evita de provocacions que se poirián téner s’aquelas femnas rescontrèsson d’autres òmes que lors “gardians”.
 
L’òrdre especifica pas l’usatge d’una pèça concreta, mas si que recomanda exprèssament la burqa, comuna per las femnas jos l’anterior regim taliban, entre 1996 e 2001.