A XIII, aquò es estranh, mas es al mes de mai que se fa Sant Miquèl!E òc, en campionat d’Elèit 1 coma per la Cup, lo venceire de l’edicion 2022 serà diferent del venceire de 2021 en seguida de las resultas de las mièjas finalas.

Carcassona-Limós pel planchòt
 
Dissabte, en mièja finala del campionat d’Elèit 1, Carcassona recebiá lo campion Lesinhan. Amb l’ajuda del vent, los locals s’installavan dins lo terren corbierenc e amb tres ensages transformats e una penalitat menavan lèu 20-0. Lesinhan marcava un ensag mas lo darrièr mot demorava als Canaris que rintravan als vestiaris amb un avantatge bèl: 24-6.
 
A la represa, los Molinièrs tornavan motivats e marcavan dos còps per se raprochar a 18-24, mas un ensag transformat e un tombat confirman la qualificacion dels carcassoneses per la finala: 31-18.
 
Dimenge, a l’Agulha, los limosencs, primièrs de la fasa de classament, recebián los catalans. La partida foguèt de sens unic e dominada pels locals: 36-4.
 
Carcassona e Limós se tornaràn trapar lo dimenge 22 de mai a Narbona per emportar lo trofèu Max Rousié.
 
La finala dels juniors opausarà los tolosans, venceires de Lesinhan 56-14, als catalans qu’eliminan Albi: 70-8.
 
Aquesta dimenjada, se jogaràn los barratges de l’Elèit 2: Vilagalhenc-Argon reçauprà l’Escura (dissabte 14 a 16h) e Entraigas anirà desfisar Illa.
 
 
Cup: Wigan escomenja los Sants
 
A Leeds, avián luòc las mièjas finalas de la Cup. Wigan atacava volontàriament son oposicion amb lo deteneire del trofèu, Saint Helens. Los Combatents marcavan tre la tresena minuta, un novèl ensag al quart d’ora e un tresen a la mièja ora per menar 14-0 a la pausa. Los Sants marcan dos còps e tornan a 12-14. James Roby permet als Sants de menar 18-14, mas un quatren ensag de Wigan los elimina 20-18.
 
A Saint Helens, lor i demòra de festejar la Cup emportada per son esquipa femenina en batent Leeds 18-8.
 
Dins l’autra mièja finala, cavalièr sol dels Gigants d’Huddersfield fàcia a Hull KR: 25-4.
 
Wigan e Huddersfield se traparàn dins l’estadi de Tottenham a la fin del mes per ganhar lo trofèu.
 
Mentretant, la Superliga repren sos dreits. Dissabte, los Dragons reçaupràn los Lops de Warrington e dimenge, a 3 e mièja del vèspre, lo Tolosa Olimpic ensajarà de signar una victòria fàcia a Wakefield.
 
 
NRL: las Anguialas escanan las Pantèras
 
Aitant los jogaires de las Anguialas foguèron transparents fàcia als Vaquièrs la setmana passada, aitant joguèron determinats aqueste divendres a Penrith per faire plegar pel primièr còp de la sason los campions, de Pantèras atupidas: 22-20.
 
Los campions daissan la primièra plaça al classament a Melbourne, qu’a batut 42-6 los Dragons de Sant Jòrdi.
 
Aquesta dimenjada serà lo Magic Torn amb las 16 esquipas recampadas a Brisbane amb un programa de primièra coma… Melbourne-Penrith dissabte o Polets-Anguialas dimenge.
 
 
 
 
Alan Roch