Bandièra01 capçalera  1180x150: Novestivada

Actualitats

Torna ÒC Brigada Internacionala per far reviure la Nòva Cançon occitana

Plan mai nombroses e intrepids, presentan un nòu disc e un nòu espectacle a Barcelona e Tolosa

| Juan Miguel Morales / cancioneros.com

Tèxte legit

Una reïnterpretacion festiva de la musica occitana facha per Alidé Sans, Joan Garriga, Gigi de Nissa, Milèna Pastorelli, Carles Belda, Marc Serrats, Rodin Kaufmann, Tatou, Maria Roch, Cidao e plan d’autres que reprenon las cançons Claudi Martí, Rosina de Pèira, Maria Roanet, Mans de Breish, Joan Pau Verdier, Jacmelina, Lúcia Mas... al ritme de rumba, cúmbia, ska, house, r&b o hip-hòp.


Dètz ans après sa presentacion a l’Estivada de Rodés, la còla d’ÒC Brigada Internacionala torna nombrosa e amb vam per presentar d’interpretacions revolucionàrias de las cançons mai conegudas pels occitans occitanofòns. Aital presentan un nòu disc amb un espectacle, dissabte que ven a Barcelona e per Sant Joan a Tolosa. “Uèi per uèi i a de cançons que son de veritables imnes per una generacion d’occitans —araneses compreses— coma L’immortèla o Perqué m’an pas dit que riscan de desaparéisser se sèm pas capables de las tornar far atractivas pels joves”, çò dison. Nos contan tanplan la significacion del nom: “«Ò» coma Occitània, «C» coma Catalonha”, «brigada» de complòt e «internacionala» perque las frontièras impausadas empacharàn pas jamai de nos comprene”.
 
A l’origina i trobam los musicians catalans Carles Belda e Marc Serrats (dich Xerramequ) qu’amassèron de musicians catalans e occitans dont Gigi de Nissa e Stefano Degioanni, de Lou Seriol. Ara, an tanben jonch la “brigada” Alidé Sans, Tatou de Moussu T, Rodin Kaufmann, Arnaud Cance, Milèna Pastorelli e plan d’autres. Presentan de causas extraordinàrias coma una version rumba de Se Canta, una version ska de La Copa Santa, una version fòrça obrièra dels Carbonièrs de la Sala, una version punk de Perqué m’an pas dich a l’escòla o quitament una version version reggae de Jol pont de Mirabèl... Aital, lo retorn d’ÒC Brigada Internacionala fa reviure las grandas cançons de Claudi Martí, Rosina de Pèira, Maria Roanet, Mans de Breish, Joan Pau Verdier, Jacmelina e Lúcia Mas. A mai, tanben an reïnventat de classics coma Lo Boièr, Joan Petit o Los Caulets, e an quitament gausat d’inclure de cançons de Massilia Sound System, Nadau e Zebda.
 
La proposicion se representarà en primièra aqueste dissabte que ven, 14 de mai a 20h30 a Barcelona dins l’encastre del festenal Barnasants, e lo 25 de junh a Tolosa, per la fèsta de Sant Joan que l’organiza Convergéncia Occitana.
 
Lo disc serà gratuit sus las plataformas musicalas abitualas e la version fisica serà acompanhada de tèxtes d'explicacion e contextualizacion de cada pèça. Jornalet collabòra tanben amb aqueste bèl projècte.
 
Las intradas pel concèrt de dissabte a Barcelona se pòdon aquerir en linha sus aqueste ligam.
 
  
 

 
 

abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
2.

Brigada internacionala ? An d'intencions plan orientadas, pecaire !

  • 2
  • 0
Mai Republica es abordida mai legiférís !
1.

E ben, es brica ma tissa aquò, n’ai lo pelfic d’escotar. De mai an cap de gestuala occitana !

M’agrada milhor aquò :

https://www.youtube.com/watch?v=NjuvA9qTX98

Ai enquèra pensat a tu anuèch
Siás pas vengut e las flors fusquèron malcorada per tu
Ai esperat entrò lo matin
Las quitas pluèjas qu’aimavas se son atancadas
Soi venguda timborla quora pensèri a tu
Ai maldich la nuèch que t’a emblada
Ai demandat nòvas a ma coissinièra
Ai demandat nòvas a la cambra d’amics
Ai demandat comptas a las parets qu’ai tustadas
Ten me las mans, alisa mos pièls sus tos ginolhs dins aiceste carrièra de color malva
Ai comprés cossi t’aimavi tant quora siás partit ai plorat dins las nuèchs descabestradas
Anuèch s’estropa ton absencia de remembres
Ai begut lo mond comprenon apèi la perda.
Degun ten tant de bontat que tu
Ai pas aimat aquel sòmi que s’acaba al mai polit endreg se tornavas
Se vòs tornar viure pausarai pas d’estelas a tos pès ?
Sarai pas la posca dels camins d’ont venes. Es l’alba.


Vertat que me sentissi plan mai d’aise dins aquelas cançons :

https://www.youtube.com/watch?v=qkh0Nr7keV4

per aiceste las paraulas son reviradas en anglés sul clip.

Benlèu que soi pus occitan ? qual sap ?

  • 3
  • 1

Escriu un comentari sus aqueste article