Bandièra01 capçalera  1180x150: Novestivada

Actualitats

Puègserguièr: una Prèma Total Festum 2022 ben capitada

Lo public respondèt present per la Prèma o èx-fèsta de la musica prematura... e n’aviá plan de besonh!

| Goulamas\'K

Imaginatz una reünion de familha d’a la gròssa 2000 personas amb d’estanquets assalits, de taulas clafidas e un empont animat duscas a d’oras (plan) tardièras… Imaginatz de carrièras investidas per de caps gròsses e d’animals totemics tipics del país bassòl… E encara auretz una idèa aproximativa de çò que signifiquèt lo retorn de la Prèma a Puègserguièr après dos ans d’abséncia.


Lo 14 de mai, l’associacion Patatr’òc organizèt aquela fèsta que dobrís la sason de las festejadas estivencas e que, en 28 ans d’existéncia, es venguda un rendètz-vos indefugible del País Besierés. Quand un bon nombre d’organizaires de manifestacions culturalas crentan de far fogaça, los de la Prèma avián puslèu la crenta invèrsa, a saber d’aver tròp de monde! La programacion es a l’imatge de la concepcion qu’an lo monde de Patatr’òc d’una fèsta populara: a l’encòp lo caire tradicional e a l’encòp lo caire alternatiu.
 
La Prèma se se dobriguèt a 18h sus un passacarrièra d’animals totemics acompanhats dels caps grossos de Catalonha. Passèron lo pelican de Puègserguièr (logic), l’ase de Bessan e tanben lo polin de Pesenàs que, costumièrament, son plaçats en cap de carreg pendent Carnaval. “La comuna es plan contenta que Patatr’òc mene un molon d’accions culturalas al vilatge”, çò nos expliquèt Fred Cot, cantador de Goulamas’K e pilar de Patatr’òc, es per aquò que nos ajuda plan e que los emplegats municipals nos ajudan a montar los emponts (…) Cal menar l’accion ont vives”.
 
E mai foguèsson los caps d’aficha de la serada, los sièis sòcis de Goulamas’K an ajudat a l’organizacion e l’installacion amb los benevòls. A l’òbra dempuèi una setmana, èran lasses mas aüroses de veire tant de monde afluir al cap de la carrièra de la Gaie Sortie (sic), sit de la fèsta. Jogar a domicili es tant agradiu coma estressant mas après aver facha la primièra partida de Manu Chao a Servian (Besierés), s’o pòt pas tot afrontar? “Arribam de gerir la pression mas aqueste ser i a la familha, los amics, los vesins, lo farmacian, lo florista… (rires)”, çò nos diguèt la flaütista Floreta Lluís Gual. Pasmens, fasiá de ben de tornar trobar la Prèma après tres ans d’abséncia, e mai se tenguèsson de concèrts en distancial o en presencial al vilatge o dins la garriga a l’entorn.
 
Los autres dos grops presents pels concèrts son dins la meteissa draia punk festiu que lors òstes. Venguts de las Bocas de Ròse e de Var, las Cigales Engatsées venguèron presentar lor mescla energica entre galobet, sansonha electrica e guitarra saturada. Tot partiguèt d’una virada en companhiá dels Ramoneurs de Menhirs quand William (cant-sansonha) e Mika (bataariá) apertenián encara al grop Crétins des Alpes (sic). Lauran, guitarrista dels Ramoneurs e ancian Bérurier Noir lor pausèt alara una question tota simpla: “Un jorn, nos demandèt s’aviam pas un grop de punk en Provença”, çò expliquèt William. Atal Mika faguèt l’escomesa de trobar de musicians e ensajar de fargar un grop d’aquela mena. Atal nasquèron las Cigales Engatsées fa 4 ans. Profeitèron plan del(s) confinhament(s) per poder repetir e bastir lor repertòri coma cal. Per ara an pas publicat que dos EP… mas un album complet es en gestacion del costat de Provença. Per elas e el, lo confinhament a pas cambiat grand causa. Lo grop punk Las Monsenhas fa de musica en amator al 200%, se fa plaser e ten pas de plan de carrièra. “Se pausam gaire de questions, prevesèm ren e aquò se passa ben”, çò nos diguèron. Lor punk ròck es simple, lor paraulas plan pebradas e provocantas dins la vena d’un grop coma Sexy Sushi. Tant per dobrir la serada coma per la clavar, las doas formacions convidadas a Puègserguièr faguèron lo mestièr.
 
Aquela Prèma s’acabèt pro tard dins la nuèit erauresa, coma se deu. Lo còr de vila de Puègserguièr a tornat trobar sa placiditat costumièra… mas se sentiguèt plan que los estatjants avián plan besonh de la destorbar un bon còp.

 
 
 
 
Clamenç Pech
 
 

abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article