Òc- tota pèira fa paret !
Sèm tombats al fons del potz. Emai lo potz de la plaça siague estat restaurat polidament...las pèiras netejadas, ornat de geraniums sul relaisset, s'ausìs pas mai lo clicadìs de la cadena, prometor de frescura e de plaser...
Tot çò qu'ajuda per tornar far sortir la lenga del potz ( ambe qualques resèrvas...solide) es bon de prene. Vesi pas cap de contradiccions entre l'iniciativa çai-sus citada ( e los exemples en Occitània) e l'organisacion de "La Passèm" ( una de las pus polidas iniciativas nòvas per sosténer la lenga, segon l'ancian correire de fons que soi estat ) ,... mas m'arriba tanben d'anar beure un còp entre amics...
La diferencia es que " La Passèm" demanda una bèla organisacion portada per de volontaris benevòls ( que lor tiri mon berret )...alara que d'encoratjar l'usatge de l'occitan dins un estanquet es sustot una question de volontat dels gerents.
Per aquò, me sembla ( fa benlèu detz còps que ne parli dins Jornalet) qu'es important de manifestar de longa e tranquilament nòstra volontat e plaser de parlar e d'ausir la lenga......per aquò, un sol pichon "pin's", espillat a la camisa, pòt far l'afar...vos o pòdi dire....Me diretz, per virada, que jà, Macarèl (sens bravament de reflexion, probable) ne sortiguèt un. ...òc...mas es destinat a l'entre-se occitanista...ont totes nos tutejam..." PARLA ME OCCITAN"
. Ma maire m'a totjorn dich que caliá totjorn vosejar (levat los dròlles ) los desconeguts..e es devèrs eles que,me sembla, se cal manifestar. Tanplan ne ' bricolejèri un "Parlem nos en occitan ! " ( pòt ésser diferent, del moment que se respèctan los interlocutors eventuals) e vos pòdi dire que suscita sovent l'interès e l'usatge ( de còps maladrech...rai d'aquò! ) dins de situacions e luòcs inesperats....

E cossí aver pas una reflexion sus objectius e accions del grop de defensa de la lenga catalana-
"Plataforma per la llengua"....ramenada , solide , a la situacion nòstra...tant aluendada de la dels paises catalans...
Se que non , aurem , coma o fa remarcar J P Alari, qu'a nos acontentar de conferencias en francés sus d'autors qu'an enauçat una lenga que se morís...

...la lenga demorarà al fons del potz, aquel potz tan plan afachat ambe son teulat renovat, sas pèiras netejadas, sas flors sul relaisset , ultim e patetic testimonatge d'una civilisacion dispareguda e d'una lenga mòrta per la volontat de la far morir , e, tanben, per l'incapacitat de la defendre e de l'adaptar al monde d'uèi...

#2 "que balha maishants resultats". es aisit de tustar sus una de las raras institucions occitanistas que saja de héser avançar las causas.

a calandreta, los dròlles parlan pas occitan pr'amor d'una obligacion o d'un interest superior. lo hèn pr'amor dens l'escòla aquò's naturau, e que tot es organizat ende balhar enveja de parlar occitan. e dens una certa mesura, aquò marcha. díder lo contrari es probar que n'an pas jamei fotut los pès dens una calandreta. la màger part daus còishes que sòrten de calandreta en CM2 après tota l'escolaritat dens lo sistèmi son capables de parlar occitan com fau, damb subjonctius e vocabulari.

si contunhan pas un còp que son sortits dau sistèmi, es pas la fauta de l'escòla, es pr'amor parlar occitan dens la societat francesa contemporaneva es inutile e pas valorizat. lo problèma es pas "pr'amor de calandreta" mès pr'amor de tot çò qui n'es pas calandreta, justament, e on l'occitan n'a pas de plaça. parlar occitan, los adultes ic hèsen pas, la tele ic hèi pas, las afichas suus murs ic hèsen pas. perqué los dròlles serén diferents ?

#4 Cresi que l'informacion es mès importanta que çò que pensatz. Tot çò que hè parlar de la lenga es bon. D'un biash positiu, solide. L'enemic purmèr es lo desbromb. E cresi pas que podèm opausar solucions a d'autas solucion. Tot es bon.

"Tota pèira fa paret!."