Bandièra01 1180x150: Comuna de Tolosa

Actualitats

LibresLengaCultura
crotz-tolosaCreated with Sketch.GasconhaArmanhacPaís d'Aush

Era hèsta de Sant Jòrdi qu'arribe enquiath Salon deth Libe d'Aush

Deman que comence en Aush era dusau edicion deth Salon deth libe occitan

| Anna Pallarès

Tèxte legit

Cinc dies dempús dera celebracion de Sant Jòrdi ena Val d'Aran, era tradicion catalana dera arròsa e deth libe que se'n va entà Aush, que hestejarà per dusau viatge era jornada mondiau deth libe. S'agís de dues jornades culturaus e hestives ar entorn de taulèrs de libes en lengua nòsta entà descorbir, escambiar e partatjar.


Deman dissabte entàs 14h que comence era hèira ena Maison de Gasconha, damb ua seguida de conferéncies sus expressions gascones e istòria. Tàs 19h se daurirà eth salon e tàs 19h30 un bal clavarà era jornada. Eth lendoman peth maitin, ath delà des concorsi de Scrabble en occitan, que i aurà d'improvisacions musicaus sus tèxtes dera nòsta literatura, bal, musica e cants.
 
Er escrivan agenés Marcèu Esquiu que serà eth pairin deth salon, que compdarà tanplan damb era preséncia des autors Claudi Pierson, Jordi Labouysse e Bertran Dutilh. Es editors presents que seràn Per Noste, la Talvera, Princi Negue, Ideco, Letra d’Òc, Vistedit, la Librairie Corbel, Privat, Lacour, Loubatières, Cairn, Reclams, Atlantica e Edition du Rouergue. Que se poderà veir tanben era participacion des comerçants d'Aush.
 
En salon se i poderà veir eth diaporama "L'occitan, qu'es aquò?" hèt pera seccion departamentau der IEO, que hè un còp d'uelh ara lengua deth país capvath era istòria e era toponimia.
 
En Sant Orenç, ath cant de Tolosa, se debanarà eth madeish dimenge era Jornada deth libe occitan.
 
Mès informacions sus eth sit dera municipalitat d'Aush.


Ferriòl Macip
 
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article