Bandièra01 1180x150: Comuna de Tolosa

Actualitats

Rugbi de XIII: gaujós coma un canari campion!

| Carcassonne XIII

Tèxte legit

“Gaujós coma un canari campion”, aquí una formula que deuriá figurar dins lo diccionari de las comparasons popularas de l’Aquiles Mir, mas lo felibre èra pas dels uèit milierats d’espectators a Narbona aqueste dimenge 22 de mai per seguir la finala del campionat d’Elèit 1 del XIII entre Carcassona e Limós.


Las causas comencèron puslèu plan per la formacion roge e negre que Carcassona balbucejava son rugbi: un carton jaune e Belmaaziz marcava l’ensag, Templeman transformava e ajustava una penalitat per un romegadís de l’adversari. A la mièja ora de jòc e d’una dominacion limosenca esterila, los canaris desplegavan una ataca de tria sus la largor del terren e lo segonda-linha Serulevu cabussava en tèrra promesa. Herrero transformava. Los Jaune e Negre tornèron faire lo còp d’una combinason (capitada a la finala de 2021) costat tampat e lo capitani Alexís Escamillà marcava. Amb los 2 punts de la transformacion, Carcassona virava a la pausa e jos una calor bèla amb un avantatge de 12-8.
 
A la represa, sus un cinquen tengut, Herrero tustava una candela sul pichon costat e l’arrièr australian Dane Franis atrapava la palma al nas de la defensa advèrsa per marcar. Templeman ajustava una penalitat al cabal blanquetièr, Una novèla ataca dels canaris trapava l’alièr Sobeiràs en cap de linha per marcar dins lo recanton (20-10). Limós contunhava de mandar sos pilars cargar e cargar encara; un ensag marcat e transformat a la 78a minuta reduguèt la marca a 20-16, mas èra tròp tard. La còrna e lo bloquièr Max Rousié prenián la direccion de Ciutat, ont los sostens, dins un grand ambient festiu, s’èran ganhat lo dreit de faire petar los taps de… blanqueta!
 
 
Una cordelada de campions
 
Aquesta dimenjada, foguèron 8 títols de campions que s’autregèron dins aquesta Prima del XIII a Narbona:
   
Aquesta dimenjada, se jogaràn las mièjas finalas d’Elèit 2: Pià-Illa e Baó fàcia a Vilagalhenc-Argon.
 
— Superliga: mal sòrt per Tolosa e victòria pels Dragons.
 
Los tolosans i arriban pas: divendres de ser, a Huddersfield, menavan 16-12 a qualques minutas de la fin, de minutas ont los Gigants marquèron un ensag e un tombat per batre la formacion occitana: 17-16.
 
Dissabte, a Hull, fàcia a Hull KR, los Dragons prenguèron un ensag tre la tresena minuta, puèi una penalitat: 8-0 pels locals. Tom Davies marcava dins lo canton. A la represa, novèl temps de dominacion d’Hull KR, mas Matieu Laguèrra interceptava e marcava aprèp 90 mètres de corsa. Artur Morgue transformava e los catalans prenián l’avantatge: 10-8. Avantatge qu’anavan confirmar per un novèl ensag: lo 89n jos las colors catalanas de Fouad Yaha, tranformat per Morgue qu’ajustava doas penalitats. Victòria catalana: 20-8.
 
De mai, coma Wigan pèrd 22-31 sus l’estadi vesin d’Hull FC, los catalans se trapan sols en segonda posicion al classament darrièr Saint Helens que se deu emplegar per ganhar a Warrington: 12-10.
 
Aqueste dissabte, plaça a la finala de la Cup sus la pelena de Tottenham entre Wigan, que serà favorit, e Huddersfield.
 
 
NRL: los Vaquièrs plens de vam
 
Las Pantèras de Penrith an tornat prene lor ritme de crosièra: victòria 32-12 a Sydney cò dels Polets alara que los Vaquièrs son sens pietat 36-6 per Melbourne. Divendres, las Pantèras reçaupràn los Vaquièrs: aquò promet!
 
 
 
 
Alan Roch
 


 
 

abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article