Amb lo partit Resistiscam de Joan de Lassala, tres candidats venguts de la lista de las regionalas Bastir Occitània se presentan a las eleccions legislativas de 2022 en Nauta Garona. S’agís de Jiròni Picas (5a circonscripcion), de Sylvie Bonnemaison (6a) e d'Angélique Eymond (7a).

 

Dins la cinquena circonscripcion, que recampa los cantons de Fronton, Granada de Garona, Tolosa XIV e Vilamur de Tarn, lo candidat Jiròni Picas amb la suplenta Linda De Lorenzo, (qu’èra tanben dins la lista Bastir Occitània l’an passat), es ara investit pel movement de Joan de Lassala. Un primièr contacte amb Resistiscam foguèt pres al moment de la candidatura de Jiròni Picas a las eleccions legislativas de 2017, quand, identificat alara coma “regionalista occitan”, èra candidat del Partit de la Nacion Occitana (PNO) labelizat Bastir Occitània.

 

Jiròni Picas defend demest sas idèas de redusir lo milafuèlhas territorial, al nivèl economic de favorizar los camins corts, o encara de botar en plaça un “tiquet païsan”, sul principi del tiquet restaurant, en encoratjant a crompar dirèctament als productors locals; al nivèl escolar de generalizar l’ensenhament d’una segonda lenga tre l’escòla primària, la lenga regionala locala o una lenga estrangièra (a la causida dels parents).

 

 

 

 

Linda de Lorenzo e Jiròni Piques