Bandièra01 1180x150: Comuna de Tolosa

Actualitats

Rugbi de XIII: Total Tristum per Pentacosta

Aqueste dimècres a Sydney, primièr afrontament State of Origin de la sason entre Nòvas Galas del Sud e Queensland
Aqueste dimècres a Sydney, primièr afrontament State of Origin de la sason entre Nòvas Galas del Sud e Queensland | The Daily Rugby

Tèxte legit

Tre la debuta de la partida divendres a Brutus, los Gigants d’Huddersfield trapan la 40-20 e encadenan per un ensag. Doas corsas trencantas coma un escalpèl e los Dragons se trapavan menats 18-2 a la pausa. Marquèron dos ensages per tornar a 14-18. N’ajustèron un tresen a cinc minutas de la fin, mas l’arbitre trapèt una rason, o puslèu una desrason, per lo refusar. Fin finala, desfaita dels catalans 22-14 que veson lor adversari del jorn tornar a un punt darrièr eles al classament.
 
Dissabte, lo Tolosa Olimpic recebiá lo campion Saint Helens. Aqueste còp, los angleses se daissèron pas susprene e ganhèron 28-14. Dimenge, los occitans s’assabentavan de la corta victòria de Wakefield sus Hull FC: 19-18.
 
Las causas se complican pels Blau e Blanc que se trapan ara amb quatre punts (doas victòrias) de retard sus Wakefield —l’avantdarrièr—, sens parlar d’una diferéncia de punts plan mai negativa (— 173) que lor concurrent dirècte per aquesta funèsta darrièra plaça: — 124. Per qual serà la bilheta pel Championship en 2023?
 
Aqueste dissabte, a 6 oras del vèspre, los Dragons recebràn Hull FC, alara que dimenge a 3 oras del vèspre, lo Tolosa Olimpic reçauprà los Tigres de Castleford. Per las doas formacions, un sol objectiu: ganhar per escafar lo Total Tristum d’aquesta dimenjada de Pentacosta.
 
 
Las copas dels joves pels catalans
 
Aqueste dissabte 11, se  tenián las finalas de las copas dels joves a Pià. En U15, victòria del XIII Catalan fàcia als albigeses: 30-8. En U17, la victòria tòca l’Acadèmia dels Gècos fàcia al campion Carpentràs 24-18. En finala de la Copa Luc Nitard, la dels U19, Carcassona pòt pas res fàcia a una esquipa de St Estève-XIII Catalan qu’acaba la sason sul doblat e sens cap de desfaita. Victòria neta dels Sang e Aur: 58-14.
 
Aqueste dimenge 12, a 4 oras e mièja del vèspre, a l’estadi Brutus, serà balhat lo còp de fiulet d’entamenada de la finala d’Elèit 2: un famós dèrbi entre Pià e Baó!
 
 
State of Origin de 2022, primièra!
 
En rason del primièr rescontre de l’State of Origin a Sydney aqueste dimècres 8, solas quatre partidas èran al programa de l’NRL amb d’esquipas que devián jogar sens lors seleccionats. Las resultas foguèron ça que la confòrmas a la ierarquia del classament. Atal, los Vaquièrs ganhan cò dels Titans 32-6, victòrias dels primièrs Penrith suls darrièrs los Dògols: 30-18 e de Manly fàcia als neozelandeses (44-12). Canberra demorava mèstre sus sa pelena fàcia als Polets: 22-16.
 
 
Rendètz-vos amb Galas lo 19 a Albi
 
Lo XIII de França jogarà un rescontre internacional dimenge 19 de junh a Albi fàcia als galeses. La primièra seleccion de 27 jogaires se compausa de 13 Dragons e de 10 jogaires del Tolosa Olimpic. S’i ajustan Morgan Escarré que jòga a Salford, Loís Jouffret que jòga a Halifax (Championship) e dos jogaires d’Elèit 1: Vincenç Albèrt (Carcassona) e Baptiste Fabre (Albi).
 
 
 
 
 
Alan Roch

 
           
 



abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article