Bandièra01 capçalera  1180x150: Novestivada

Actualitats

Argeria trenca sas relacions amb Espanha

A enebit lo comèrci exterior e a congelats los prelevaments bancaris restacats amb d’operacions comercialas de produches e de servicis

Tèxte legit

Lo president d’Argeria, Abd Al Magid Tabbun (sovent transcrich AbdelmadjidTebboune) anoncièt dimècres passat la suspension “immediata” de l’acòrdi d’amistat amb Espanha, signat ara fa dos ans. La rason es la reconeissença “injustificada” d’Espanha de la sobeiranetat de Marròc sul Sahara Occidental. Per Argièr, es una “violacion de las obligacions juridicas, moralas e politicas”. L’acòrdi d’amistat èra en vigor, precisament, fins a dimècres passat, jorn qu’Argeria lo suspendèt. Precisament aquel jorn la Comission Europèa permetiá qu’Espanha e Portugal limitèsson lo prètz del gas e de l’electricitat pendent 12 meses per que foguèsse mens car.
 
En consequéncia de la rompedura diplomatica, lo govèrn argerian a enebit lo comèrci exterior amb Espanha e s’es congelat los prelevaments bancaris restacats amb d’operacions comercialas de produches e de servicis.
 
 
Lo gas dels Estats Units
 
Argeria es longtemps estat lo màger fornidor de gas a l’estat espanhòl. Un còp barrat lo gasoducte que passava per Marròc, un segon gasoducte connècta las còstas d’Argeria e d’Andalosia. Pasmens, la majoritat del gas que se consuma dins la peninsula Iberica ven dels Estats Units en vaissèls. De soslinhar qu’après l’invasion d’Ucraïna e las sancions economicas contra Russia, los Estats Units an aumentat considerablament lors vendas de gas a tota Euròpa e ne son lo provesidor màger.
 
Itàlia pòt desenant beneficiar del gas argerian a bon prètz qu’arriba per mejan del gasoducte Transmediterranèu que jonh Argeria amb Sardenha e Sicília.
 
 
L’activista Sultana Jaya: “Se pòt esperar qué que siá”
 
En seguida de la trencadura de relacions entre Argeria e Espanha, l’activista sahrauí Sultana Jaya avertís que “se pòt esperar qué que siá” de part de l’estat espanhòl après son cambiament de vejaire sul Sahara Occidental.
 
“La decision presa per Pedro Sánchez es una decision autocratica, qu'a pas pres en compte los autres partits politics e qu'es mai pròpria d’un Estat autocràtic”, çò diguèt als mèdias davant lo Congrès espanhòl dels Deputats, ont s’èra reünida amb los membres del grop parlamentari que sosten lo pòble sahrauí. Dins aquel sens, afortiguèt qu’un “estat democratic velhariá pels dreches umans e l’autodeterminacion dels pòbles”,  en apondent qu’“aquela decision favorís que Marròc ocupe tot lo Sahara Occidental e que se viòle las femnas”. “La sola responsa possibla de part d’Espanha es seguir la legalitat internacionala”, çò diguèt.
 
La traïson per Espanha del Sahara Occidental
 
A la fin de març, Espanha reconeguèt  la sobeiranetat de Marròc sul Sahara Occidental. Lo primièr ministre espanhòl, Pedro Sánchez, mandèt una letra al rei Muhammad VI en disent que la proposicion que la faguèt Marròc en 2007 li semblava “la basa mai seriosa e realista” per resòlver lo conflicte, e reconeissiá “l’importància de la question del Sahara per Marròc”.
 
Aquela decision a provocat un rambalh politic al sen de la coalicion que govèrna l’estat espanhòl, car los de Podèm se desmarcan d’aquela letra e insistisson per que se respècte “la volontat democratica del pòble saharauí”. Mas sustot a provocat l’indignacion del Front Polisario e la rompedura diplomatica amb Argeria.




abonar los amics de Jornalet

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
1.

Almenys algú fa res amb les maleses de l'estat ispà, si la fan la...però a spain -no passa res-, -ja trovaran una solució-, -ja pagaran els Catalans-,i tot normal i tothom trova bé, les barbaritats que fan.
Que s'en vagin a l'..., almenys que algú el faci pagar tot el que han fet.
Visca la Terra...Lliure! I sobretot d'ells.
L'Ernest, "El Tàrrega".

  • 0
  • 0

Escriu un comentari sus aqueste article