L’equipa de Pià clava sa sason en Elèit 2 sens cap de desfaita. Aqueste dimenge, dins la finala catalana dins l’estadi Brutus, la conclusion foguèt pas aisida fàcia a Baó, que marquèt d’entrada per menar 12-0. Las doas formacions se trapèron a egalitat al cap de 80 minutas. Ne calguèt passar pel punt en aur: Baó manquèt un tombat e Pià passèt lo de la victòria: 15-14. Òm tornarà trapar la formacion catalana l’an que ven en Elèit 1.
 
 
De l’utilitat de se faire brandir las pelhas
 
L’entraïnaire dels Dragons èra pas brica content aprèp la desfaita fàcia a Huddersfield: manca d’agressivitat sul menaire advèrs, traucs dins la defensa, manca de solidaritat, palmas perdudas, penalitats inutilas… Las sesilhas d’entraïnament foguèron muscladas dins la setmana e las leçons retengudas: larga victòria dels Catalans amb 6 ensages a la clau fàcia a Hull FC: 36-8.
 
Per contra, a Tolosa, las partidas se seguisson e se semblan: una bona debuta, puèi una fin malastrosa: novèla desfaita a Ernèst Wallon 20-14 per la recepcion de Castleford e, ara, 6 punts de retard sus un grop de tres formacions. Caldriá arribar, al mai lèu, de trapar la marcha endavant del costat del Capitòli…
 
 
Queenslandganha a Sydney
 
Es a Sydney que se jogava aqueste dimècres 8 de junh la primièra de las tres confrontacions de 2022 del State of Origine. Demorava pas una plaça de liura, 81 000 espectators seguiguèron la partida que se placèt aisidament a la primièra plaça de l’an de las audiéncias televisadas en Austràlia.
 
Los Blaus locals dobriguèron la marca, mas a la pausa Queensland menava 6-4. A la represa, lo mièg dels Marrons Cheryl Evans s’escapa darrièr la mesclanha per anar puntar l’ensag: 12-4. Los vesitaires n’ajustan un per l’alièr Holmes: 16-4. Los Blaus vòlon pas pèrdre, marcan un ensag, lo transforman: 10-16. Mas la formacion locala traparà pas de solucion novèla dins las 8 minutas restantas e deu reconèisser la desfaita. Segond rendètz-vos lo dimenge 26 de junh en terren nèutre a Perth.
 
La jornada de campionat vei una cordelada de victòrias al defòra: los Lapinons cò dels Titans: 30-16; Melbourne cò dels Poletons: 26-18; Manly cò dels Tigres: 30-4; las Làmias a Auckland: 38-16 e lo primadièr Penrith s’impausa a Newcastle: 42-6.
 
 
Rendètz-vos internacionals
 
Aquesta fin de junh, veirà de rescontres internacionals se téner tant en Euròpa coma de l’autra part de la planeta.
 
Las formacions tricolòras femenina e de XIII-cadieral jogaràn en Anglatèrra aquesta dimenjada. Aqueste dimenge 19, a 3 e mièja del vèspre, lo XIII de França reçauprà Galas a l’Estadium municipal d’Albi per preparar la Copa del Mond de la tardor. BeInSport retransmetrà la partida, çò qu’es una bona causa per la visibilitat del XIII, mas res non val de seguir una partida dins l’estadi; alara, comptam plan de vos rescontrar a Albi; beurem un còp amassa a l’estanquet e nos direm un còp de mai: “Lo XIII, aquò òc!”.
 


Alan Roch