Bandièra01 1180x150: País Invisible

Actualitats

De violéncias entre la polícia de Tanzania e las comunautats massais

Lo govèrn vòl expulsar 70 000 personas de lors tèrras per i far una resèrva naturala

Protèsta massai en genièr 2022
Protèsta massai en genièr 2022 | Oakland Institute

Tèxte legit

Divèrses afrontaments entre la polícia de Tanzania e de comunautats massais aquestes darrièrs jorns an fach de desenas de ferits, un nombre indeterminat de desplaçats e un agent mòrt, segon divèrses rapòrts de jornalistas e d’associacions.
 
Los afrontaments se son tenguts a Loliondo, dins lo districte septentrional de Ngorongoro, frontalièr amb Kenya. Dins l’encastre de l’espandiment dels airals naturals protegits a aperaquí 1500 Km2, lo govèrn de Tanzania vòl desplaçar environ 70 000 massais qu’i demòran.
 
Los afrontaments an nafradas mai de 30 personas e i a una desena de caps massais detenguts, segon The Guardian. Lo jornal anglés parla de centenas de personas que se son amagadas dins los bòsques per fugir la violéncia, e segon Survival International serián divèrses milièrs. Lo mèdia sud-african News24 assegura aver vist un rapòrt que detalha que las personas feridas an de cambas rotas, de nafraduras de balas e de plagas al cap.
 
Segon la BBC, a qualques unes dels ferits lor a calgut cercar l’assisténcia medicala en Kenya perque Tanzania lor l’a rebutada. L’organizacion Forest Peoples assegura qu’un d’aqueles massais moriguèt voidat de sa sang mentre qu’èra menat devèrs lo país vesin.
 
Lo govèrn de Tanzania afortís que la creissença de la populacion umana e de lors tropèls en Ngorongoro menaça la vida salvatja dins la region. La presidenta del país, Samia Suluhu Hassan, a avertit que la preséncia umana dins la zòna “met nòstre patrimòni mondial en perilh”. “S’aquò es mai important”, çò s’es demandada, “o lo sosten de la preservacion del patrimòni e relotjar aquelas personas en un endrech melhor?”.
 
Plusors fonts, compreses lo jornal The Guardian, lo Grop Internacional de Trabalh pels Afars Indigènas (IWGIA) e l’Oakland Institute, rapòrtan que lo govèrn tanzan se servís d’aquel argument per crear una resèrva orientada devèrs lo torisme de grand standing ont se poirà caçar e que serà gerida per una companhiá dels Emirats Arabis Units.
 
Los massais denóncian que lor pòble es mai d’un còp fòrabandit de divèrsas tèrras dempuèi lo començament del sègle Xxn: primièr, pendent los primièrs dos decennis del XXn, per las autoritats britanicas en Kenya, per far de plaça als colons europèus. E mai tard, en Tanzania, per la creacion de pargues coma los de Serengeti o Ngorongoro.
 
Los massais son a l’entorn de 2 milions de personas, dont aperaquí 1,2 milion demòran en Kenya e 800 000 en Tanzania. Constituisson una minoritat dins los dos estats.
 
 
 
 
Aquesta nòva es adaptada de Nationalia amb qui Jornalet ten un acòrdi de cooperacion.


abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article