Bandièra01 1180x150: Comuna de Tolosa

Actualitats

Una fresca Miquèl Decòr a Bisan de Menerbés

L’òbra, realizada per Raols Cuadrado, repren la frasa emblematica: “Farai del Carnaval la fèsta nacionala”

| Benjamin Assiá
A Bisan de Menerbés, aqueste dimenge 26 de junh, dins l’encastre del Total Festum de la calandreta Lo Cigal, s’inaugurèt, al centre del vilatge (plaça Pélofi ), una fresca dedicada a Miquèl Decòr (1949-2021). L’òbra, realizada per Raols Cuadrado, repren la frasa emblematica: “Farai del Carnaval la fèsta nacionala”.
 
En preséncia de membres de la famille del poèta, las presas de paraula botèron endavant los ligams de Miquèl Decòr amb son vilatge natal coma la granda umanitat de sas produccions, dobèrtas sus la mar nòstra e portairas d’un grand messatge de patz. Prenguèron la paraula: Alan Fabre (maire), Benjamin Assié (adjunt, conselhièr regional, ancian director del CIRDÒC), Mirèlha Fornengo (calandreta Lo Cigal), Joana-Maria Vazelle (CIRDÒC), Joan-Francés Albèrt (calandreta de Carcassona), Alan Roch (IEO Aude), Miquèla Stenta (escrivana). S’escotèt la votz del poèta (qu’èra tanben un diseire de tria), d’interpretacions de sos tèxtes pels cantadors occitans. De poèmas foguèron legits pels calandrons, per Fabiana Albèrt, Mirèlha Braç e Nicòla Ferrièr.
 
Doas bonas novèlas clavèron la matinada: l’anóncia de la creacion d’un cercle occitan en Menerbés a la rintrada e lo desir de la calandreta de Puèg Marin (Carcassona) de prene lo nom de Miquèl Decòr.
 
“Siái pas jamai estat qu’un doç menaire d’ase, portaire de paraulas en quista de la patz; siái aquí res que de passatge, entre l’anar e lo venir; vos ai portat lo pan, lo vin, l’òli, la mèl, per lo partatge, jòia, amor, prètz e paratge” (Eiretièrs de la luna).



Alan Roch
 


abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Bisanòt Bisan
2.

Lo diluns 11 de julh, lo cabaret literari de l'UEO de Nimes, animat per Miquèla Stenta e Alan Roch, serà consacrat a l'òbra de poeta e de novelista del Miquèl Decòr.

  • 7
  • 0
Pitaluga
1.

Valdriá mai lo carnaval fèsta nacionala que lo carnaval que nos monta la tecnoestructura de París, totjorn mai caluga e desuùanisada.

Caldriá d'autras iniciativas d'aquesta mena per sortir l'occitan - lenga e cultura - per carrièra. I aguèsse mai de monuments aital que de monuments al mòrts, la vida seriá pas tan puta.

Una granda capelada al Miquèl Decòr !

  • 3
  • 0

Escriu un comentari sus aqueste article