En seguida d’un cors que prepausava als escolans d’occitan del collègi de la Catalaniá de Braçac (Caunés) de s’interessar a l’univèrs del doblatge en occitan de filmes e de filmes d’animacion, aqueles foguèron convidats de se botar al taulièr en realizant, eles tanben, lo doblatge d’un cort vidèo.
 
Mai d’un projècte lor foguèron presentats e cada grop poguèt causir, en foncion de sas afinitats, de doblar çò que li agradava mai.
 
Aital lo grop d’escolanas de 4a causiguèt de revirar e d’interpretar en lenga nòstra un extrach comic d’un episòdi de la famosa sèria animada umoristica estatsunidenca Los Simpsons en portant aital pel primièr còp la votz de l’Omèr Simpson en lenga nòstra.
 
Podètz aicí apreciar la resulta de lor produccion (sostítols en occitan)
 

 
Aqueste extrach entitolat “La Planèta dels Donuts” es un estrach introductiu de l’episòdi 19 de la 9a sason. Es un bon tast de l’umor mai tipic dels Simpsons.
 
Los Simpsons es una sèria animada estatsunidenca inventada per Matt Groening en 1989 qu’encontrèt un succès mondial e que contunha encara a l’ora d’ara d’èsser produsida amb sa 33a sason. La sèria es coneguda pels personatges emblematics d’Omèr Simpson e de son filh Bart qu’encarnan aqueste esquèma narratiu classic dels estatsunidencs mejans un pauc innocents mas braves.
 
Lo grop d’escolans de 3a causiguèt de revirar, puèi de doblar la benda anóncia del filme Jurassic World 3: Lo Monde d’Aprèp que sortiguèt lo 6 de junh passat al cinèma.
 
Se mancava quicòm de sexy a la nòstra lenga, aquò es enfin reglat amb la votz de l’actor Chris Pratt enfin disponibla en occitan.
 
Podètz aicí apreciar la resulta de lor produccion (sostítols en occitan)
 

 
La sèria cinematografica dels Jurassic World es realizada per Colin Trevorrow e fa resson a l’anciana trilogia dels filmes Jurassic Park. Dins aqueles filmes un miliardari a la bona idèa de trapar lo mejan de tornar los dinosaures a la vida. Coma s’aviam besonh d’aquò … Se’n seguís qu’aquelas bravas bestiassas escapan a l’arrogància umana per se passejar d’en pertot e nos fotre un brave çaganh.
 
L’avantatge màger d’aqueles filmes es que cap de capacitat intellectuala es pas necita per los apreciar.
 
Aqueles doblatges foguèron realizats per d’escolans que seguisson un ensenhament d’occitan d’una ora per setmana.
 
L’exercici del doblatge vidèo a per avantatge de far trabalhar d’a fons e amb intensitat las competéncias fonologicas dels aprenents. Es un exercici qu’es a una de las termièras las mai interessantas del teatre, ont los escolans devon absolument capitar de transmetre un messatge o una emocion amb lo sol aplech de la modulacion de la votz e del ton.
 
 
 
 
Guilhèm Thomas



 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…