Los Olimpians de Tolosa enregistran una tresena victòria de tira. Dissabte, a Ernèst Wallon, marcan d’entrada e sèrvan l’avantatge long de la partida fàcia a Leeds. Marcan tres ensages e ganhan atal 20-6. Lo meteis ser, Castleford batiá Warrington: 35-22; Divendres, gaire de mal pels primièrs 2 per ganhar: St Helens fàcia a Huddersfield 25-0 e, sustot, Wigan passa un 60-0 a Hull FC.
 
Aqueste dimenge, Hull KR bat Wakefield: 15-10. Resultat favorable per Tolosa, que daissa la darrièra plaça al classament a Wakefield.
 
Los tolosans an una famosa carta a jogar tre aqueste dissabte de ser (20h) amb la recepcion de Salford, partida seguida de la venguda d’Hull FC lo divendres 29.
 
Se Tolosa es sus una dinamica positiva, es pas lo cas dels Dragons Catalans. A Salford, marcan los primièrs, mas son menats 12-6 a la pausa. Encaissan 3 ensages de mai dins lo segond temps per pèrdre: 32-6. Flaquesa defensiva e manca d’imaginacion ofensiva: los sostens espèran quicòm mai dissabte a Brutus per la recepcion d’Huddersfield.
 
 
Refòrts pels Dragons
 
Lo club sang e aur prepara la sason venenta. Aprèp l’alièr de Wakefield Tom Johnstone e lo pilar dels Roosters Siosiua Taukeiaho, los Dragons anóncian la signatura del segonda-linha neozelandés Manu Ma’u que jòga per ara cò d’Hull FC.
 
 
Queensland, mèstre d’Austràlia
 
Dimècres 13 de julh, l’estadi de Brisbane afichèt complet per reçaupre la tresena partida de l’State of Origine. Queensland aviá ganhat lo primièr rescontre a Sydney: 16-10, abans de prendre una bona brandida a Perth: 12-42.
 
L’afrontament foguèt nharrut: al cap de tres minutas, i aviá ja tres jogaires assucats aprèp de placatges solides. I agèt qualques escambis qu’utilizèron pas floretas ni mots doces! Le centre local Holmes trapa lo trauc e transforma son ensag. Los Blaus replican, puèi prenon l’avantatge aprèp una carga del pilar Saifiti que s’espatarra entre los pals. Los vesitaires menan 12-6, mas a qualques segondas de la còrna, lo talonaire Grant tusta a ras de pelena e son segonda-linha Capewel quicha sus la palma. Los Bordèu (la color de l’esquipa de Queensland) tornan a 10-12.
 
Lo segond mièg temps serà a l’avantage dels locals. A l’ora de jòc, l’arrièr Ponga zigazagueja dins la defensa dels Blaus, marca l’ensag qu’Holmes transforma. Queensland es installat dins la mitat de terren dels Blaus, mas capita pas de marcar e demòra jos la menaça dels adversaris. Fin finala, lo talonaire Hunt recupèra una palma sus un contra e se lança dins una corsa de 60 mètres que s’acaba dins l’en-but. Amb la transformacion, es sus la marca de 22-12 que Queensland ganha la partida e la tièra de 2022 dels afrontaments.
 
 
Pas de pausa per l’NRL
 
2 jorns aprèp aquesta partida famosa, lo campionat tornava prene sos dreits. Se 3 esquipas se son impausadas a domicili, las Anguialas contra los neozelandeses (28-18), los Polets contra los Dragons (54-26) e Manly fàcia a Newcastle (42-12), las autras 5 partidas an vist la victòria dels vesitaires: las Làmias cò dels Vaquièrs (26-12), los Cavals Fòls cò dels Titans (16-12), los Lapinons cò dels Dògols (36-28), Canberra a Melbourne (20-16) e las Pantèras primadièras cò dels Tigres (18-16)

 
 
 
 
Alan Roch