De milièrs de pompièrs contunhan de luchar contra los incendis en Euròpa. Mai de 30 incendis son a cremar la peninsula Iberica, de Catalonha fins en Portugal del temps que d’autres fuòcs crèman en Grècia e Croàcia. Mentretant, en Occitània lo fuòc a devastat mai de 14 000 ectaras de la Grava de Bordèu e del País de Bug, e s’es evacuat mai de 12 000 residents, qu’an descrich una “atmosfèra pòstapocaliptica”, segon l’AFP. La causa principala d’aqueles fuòcs son las èrsas de calor que sèm a viure especialament aquesta prima e aqueste estiu. De calorassas qu’aurián provocat 238 mòrts en Portugal e 360 dins l’estat espanhòl.
 
Las èrsas de calor son de mai en mai frequentas a causa del cambiament climatic, induch per l'accion de l’òme. Lo Mond s'es escalfat d’environ 1,1^oC gra dempuèi que comencèt l'èra industriala, e las temperaturas contunharàn d'aumentar se los govèrns de tot lo Mond reduson pas significativament las emissions de carbòni.
 
Meteofrance avertís totjorn de la calorassa en Occitània, ont venèm de patir de temperaturas recòrd.
 
Dins los Alps se sollicita dels escalaires que renóncien al mont Blanc pel risc de casudas de ròcas provocadas per "de condicions climaticas excepcionalas".
 
E en Itàlia la secada istorica de las aigas de Pò a menat a la declaracion de l’estat d’emergéncia.