Bandièra01 1180x150: Comuna de Tolosa

Actualitats

Rugbi de XIII: Marcamal se passeja del costat de Tolosa

Per Tolosa, ensag de Danièl Alvaro fàcia a Hull KR
Per Tolosa, ensag de Danièl Alvaro fàcia a Hull KR | Simon HALL

Tèxte legit

Dijòus de ser, cò d’Hull KR, lo Tolosa Olimpic jogava una novèla partida decisiva pel manten en Superliga. La partida se joguèt d’un biais malastrosament plan conegut. Los occitans menavan a la pausa (12-6), menavan encara a dètz minutas de la fin e, fin finala, perdèron: 22-16.
 
Dimenge, los catalans daissèron alucat lo lumenon de l’espèr per Tolosa. Jogavan a Wakefield amb una esquipa que semblava mai, en particular cò dels davants, la formacion d’Elèit 1 en rason d’un dotzenat d’abséncias. L’alièr Fouad Yaha plantèt tres ensages que permetèron als catalans de menar 16-4 a la pausa. Remosèron totas lors fòrças en defensa per téner còp e ganhar 20-16. Lor i permet de prene una brava opcion sus la tresena o la quatrena plaça en vista de la fasa finala, mas sustot Wakefield pòt encara èsser despassat per Tolosa.
 
Demòra als tolosans: una partida a domicili (lo dèrbi fàcia als catalans, lo dijòus 25 d’agost) e 4 desplaçaments: Warrington (aqueste dijòus, partida de seguir sus BeInSport), Wigan (divendres 19), Hull FC (dimenge 28) e Saint Helens (dimenge 3 de setembre). Vertadièrament complicat!
 
Los catalans, eles, demòran en Anglatèrra per afrontar Castleford divendres de ser.
 
 
Superliga: Wigan cartona
 
Los Lops de Warrington an subit a Wigan e perdut 32-6. Los Gigants d’Huddersfield confirman lor tresena plaça en batent Hull FC 22-16.
 
Leeds ganha una partida importanta en vista de la qualificacion: 34-14 fàcia a Salford.
 
Se, de segur, St Helens e Wigan, e tanben Huddersfield e los catalans son en camin per las pelhòfas, cinc formacions demòran encara en corsa per las darrièras doas plaças: Castleford (22 punts), Leeds (21punts), Salford, Hull FC e Hull KR (20 punts).
 
 
NRL: lo grop dels 8 qualificats se precisa
 
En Austràlia, victòria al defòra pel primadièr, Penrith, a Canberra (26-6) e de Parramatta a Manly (36-20). Los Polets baton Brisbane 34-16. Victòrias contra de formacions qu’an pas pus la qualificacion en vista per Melbourne fàcia als Titans (32-14), los Lapinons contra los neozelandeses (48-10), las Làmias fàcia a Sant Jòrdi (24-18) e los Vaquièrs cò dels Dògols (28-14).
 
E, entre las 2 formacions que se qualificaràn pas, Newcastle va batre los Tigres: 14-10.
 
En cap d’aficha de la 22a jornada: Penrith-Melbourne (dijòus), Parramatta-Brisbane (divendres) e Polets-Vaquièrs (dissabte).

 
 
 
Alan Roch




abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article