Lo maraton de la Superliga es en cors. Per acabar mai lèu la competicion, en rason de la Copa del Mond, las 12 formacions van jogar quatre partidas d’aicí al 3 de setembre. Als entraïnaires de saupre faire virar los efectius per aver la melhora esquipa possibla sus la pelena per las pelhòfas!

TO: encara perdut!
 
Rendre compte d’una partida del TO es pas complicat e un jornalista fenhant i arribariá. Sufís d’escriure que los occitans dominèron lo primièr temps, mas que se faguèron despassar dins lo segond temps e, fin finala, perdèron una partida qu’èra a lor portada. Aqueste dijòus de ser, lo teatre d’operacions èra l’estadi de Warrington. Dos cartons jaunes dins lo segond temps contribuiguèron a la conclusion (desfaita: 32-18) que daissa gaire d’espèr als Blau e Blanc pel manten en Superliga la sason venenta.
 
Abans de reçaupre los Dragons a Ernèst Wallon, lo dijòus 25 d’agost, los tolosans jogaràn a Wigan aqueste divendres de ser. Vos podèm, probable, dire coma se passaràn las causas…
 
 
Los catalans pas dins lo còp
 
Los Sang e Aur avián passat la setmana en Anglatèrra. Se pòt notar que l’aire del nòrd foguèt pas gaire fortificant e brica reviscolant pels catalans que foguèron pas jamai dins la partida a Castleford. Menats 14-0, marquèron un ensag abans la pausa. Ne tornèron marcar un solet a la represa e los Tigres s’acontentèron d’ajustar doas penalitats: desfaita dels catalans 18-8.
 
Dissabte, a Brutus, los Dragons ensajaràn de se remetre sul bon camin fàcia de Diables Roges de Salford , totjorn en corsa per las pelhòfas aprèp la victòria fàcia als Gigants d’Huddersfield 33-16.
 
 
Cup: lo retorn a Wembley
 
La Rugby League anóncia: “It’s coming home!“ S’agís de la finala de la Cup que se debanarà lo dissabte 12 d’agost de 2023 a Wembley, o puslèu una tripla finala que veiràn se tenir en mai d’aquela partida, la finala de la Cup femenina e la finala de la Cup de las esquipas del Championship. La volontat de la League es que las partidas se debanen dins un estadi sens una sola plaça de liura!
 
 
NRL: zèro a l’ostal
 
En Austràlia, suspresa dijòus a Penrith ont las Pantèras recebián Melbourne: la Tempèsta se mostrèt eficaça. Los jogaires de Melbourne menavan 16-0 a la pausa e res foguèt pas marcat dins lo segond temps. Tresena desfaita de la sason per Penrith.
 
Dissabte, son las Anguialas de Parramatta que poguèron pas marcar un sol punt fàcia als Lapinons que ganhan 26-0.
 
 
 
 
Alan Roch