Bandièra01 1180x150: País Invisible

Actualitats

Brasil: comença lo duèl entre los candidats principals a la presidenciala, programada pel mes d’octòbre de 2022

Los dos candidats principals a la presidéncia de Brasil lancèron lor campanha dissabte passat, cadun en un luòc emblematic

Lula, que tornèt recobrar sos dreches politics en 2021, es per ara lo favorit dels sondatges amb lo 44% de l’as intencions de vòte contra lo 32% per son adversari
Lula, que tornèt recobrar sos dreches politics en 2021, es per ara lo favorit dels sondatges amb lo 44% de l’as intencions de vòte contra lo 32% per son adversari | Reuters

Tèxte legit

Lula torna sus l’empont
 
Lula, valent a dire Luiz Inácio Lula da Silva, dins sos 76 ans, favorit dels sondatges, causiguèt de téner son primièr acamp public dins una fabrica automobila, sus sa tèrra de São Bernardo do Campo, près de São Paulo, ont comencèt sa carrièra coma tornejaire -fresaire abans de venir menaire sindical dins los ans 1970. Afirmèt sa volontat de tornar prene lo país contra lo “genocida” e “negacionista” Jair Bolsonaro, a causa de sa gestion jutjada calamitosa de la pandemia de Covid que faguèt 680 000 victimas en Brasil. “Se i a qualqu’un qu’es possedit pel diable, es Bolsonaro”, çò declarèt l’ancian president qu’exerciguèt ja entre 2003 e 2010.
 
 
“Dieu, familha e libertat”
 
De son costat, Jair Bolsonaro causiguèt d’arremosar sos partisans a Juiz de Fora, a l’endrech ont foguèt atacat al cotèl fa quatre ans. Tenguèt un discors cargat de declaracions patrioticas e de referéncias religiosas. Renovelèt sa promessa de luchar contra l’avortament, la dròga e de defendre “la proprietat privada” fàcia a la menaça “comunista”, se per cas devia pèrdre las eleccions. Laissèt puèi la paraula a sa femna, evangelica declarada, que convidèt lo public a recitar una pregària.
 
 
Lula passariá davant Bolsonaro
 
Lula, que tornèt recobrar sos dreches politics en 2021, es per ara lo favorit dels sondatges amb lo 44% de l’as intencions de vòte contra lo 32% per son adversari. Una diferéncia que s’explica benlèu per las preocupacions dels brasilièrs ligadas a la situacion economica fòrça complicada: caumatge e inflacion son a pojar.
 
 
Una eleccion que poiriá èsser contestada
 
De notar que, de son caire, Bolsonaro a pas quitat de criticar lo sistèma electoral brasilièr, çò que pòt menar al refús de reconéisser los resultats en cas de desfacha.
 

 
 




abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article