Bandièra01 capçalera  1180x150: Novestivada

Actualitats

Rugbi de XIII: las carròtas son cuèitas e las violetas passidas

En Superliga e en NRL, es vengut lo temps ont l’òm se fa una idèa precisa de las fasas finalas de setembre

Los U19 en estagi a Tolosa
Los U19 en estagi a Tolosa | FFR XIII - Fédération Française de Rugby à XIII

Tèxte legit

Superliga: davalada e desruscada
 
Los darrièrs espèrs tolosans de manten en Superliga se son envolats. Ja, amb las victòrias de Wakefield a Wigan e fàcia a Hull FC, aquela possibilitat se demesissiá.
 
Divendres de ser, los occitans jogavan a Wigan. Dos ensages encaissats d’entrada (0-12 al cap de dètz minutas) balhavan lo ton de la serada. Lo planchòt indicava un 52-6 al final.
 
Demòra als Blau e Blanc de disputar per l’onor e amb valentisa lo dèrbi fàcia als Dragons Catalans aqueste dijòus de ser 25 d’agost, abans d’anar a Hull FC (dimenge 28 d’agost) e a St Helens (dissabte 3 de setembre).
 
Dissabte, los Dragons recebián Salford a Brutus. Davies dobriguèt la marca, mas la defensa catalana mostrava una flaquesa que permetiá als Roges (que jogavan en… blau), de marcar tres còps e de menar 18-8 a la pausa. Dins lo segond temps, las causas se melhoravan pas. Un fantaumatic recampament de dragons se trapava sus la pelena. Los angleses trapèron pas de traucs, mas de grandas fendasclas per anar marcar cinc ensages suplementaris. Salford prepausèt de causas simplas: circulacion de la palma, fixacion, jogaires lançats dins los intervals… L’ensag del capitani Garcia sonhèt pas lo malèsser dels sostens que d’unes (plan malcorats) partiguèron abans la còrna. Desfaita catalana: 46-14. Quina desruscada! An aquel ritme, es pas a Perpinhan que los Dragons jogaràn la partida dels barratges!
 
 
NRL: una cordelada d’ensages e de punts
 
En Austràlia, las marcas indican la diferéncia entre las esquipas qualificadas e las qu’acaban la sason patin-patan:
 
72-6 pels Polets fàcia als Tigres
 
42-6 per Parramatta fàcia als Dògols
 
Las Làmias ganhan 40-6 a Manly
 
Los Vaquièrs baton los neozelandeses: 48-4.
 
Entre futurs participants a las pelhòfas, Melbourne va ganhar a Brisbane 60-12 e Penrith torna trapar lo camin de la victòria cò dels Lapinons: 26-22.
 
En ganhant 28-22 a Newcastle, Canberra sèrva la possibilitat de se qualificar per las pelhòfas.
 
De notar dins las partidas de l’avantdarrièra jornada de la fasa de classament: Brisbane-Parramatta (dijòus); Melbourne-Polets (divendres); Lapinons-Vaquièrs (dissabte).
 
 
U19: campionat d’Euròpa en Itàlia
 
Del 3 al 10 de setembre, del costat d’Udin (en Friol, en Itàlia), l’esquipa de França U19 ensajarà de servar lo títol de campions d’Euròpa de la categoria.
 
Sièis autras formacions participaràn a la quista del trofèu: Anglatèrra, Irlanda, Itàlia, País de Galas, Serbia e Ucraïna.
 
Aprèp una primièra jornada de braçatge que veirà totas las esquipas se rescontrar dins un format inedit de partidas de vint minutas, se passarà a la fasa eliminatòria.
 
24 jogaires portaràn lo malhòt blau. Entre eles: 6 catalans e 7 audencs (un limosenc, 3 lesinhaneses e 3 carcassoneses), los representants dels territòris que son de plaças fòrtas del XIII.
 
 
Un França-Tònga a l’aficha
 
Una setmana abans la debuta de la Copa del Mond, l’esquipa de França jogarà lo dissabte 8 d’octòbre a Halifax amb la formacion de Tònga. Lo meteis jorn, Galas jogarà contra Liban e, la velha, los angleses reçaupràn los fijians.
 
 
 
 
Alan Roch

 
 
abonar los amics de Jornalet

 


 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L\\\\\\\'Alan Carcassona
2.

Los Catalans ganhan a Tolosa : 24-14.
Dobla confirmacion :
- los Dragons qualificats per las pelhòfas
- Tolosa en Championship l'an que ven.

  • 0
  • 0
L\'Alan Carcassona
1.

• Illustracion : Entrainament dels U-19.
• Aprèp Dragons-Salfòrd :
- Mc Ilorum, suspendut per una partida
- Artur Mourgue, nafrat a la cavilha (sason acabada ?)
- Matieu Cozzà, assucat ; poire pas jogar a Tolosa.

  • 0
  • 0

Escriu un comentari sus aqueste article