Lo primièr ministre de Singapor, Lee Hsien Loong, a anonciat qu’aboliriá la lei 377A, que punís l’omosexualitat d’una pena de dos ans de preson. Totun, a tanben dich que se cambiariá la constitucion per “protegir” lo maridatge entre l’òme e la femna.
 
Lee Hisien Loong a precisat dins un discors a la nacion que las actituds socialas envèrs la comunautat LGBTI avián cambiat “considerablament”, e pensa doncas qu’es “oportun de despenalizar las relacions entre òmes, compresas dins lo còde penal coma una indecència grèva”. A pasmens precisat que Singapor es “una societat largament conservatritz” mas que “los omosexuals son ara melhor acceptats, mai que mai entre los pus joves”.
 
Qualques jorns abans, lo viceprimièr ministre, Lawrence Wong, diguèt dins una entrevista a Bloomberg que los sondatges indicavan mai de sosten a l’abolicion de la lei omofòba e mai qualques grops religioses demanden que lo matrimòni legal demòre exclusivament entre un òme e una femna. A mai, a precisat que la lei 377A proven de l’epòca coloniala e que s’es pas aplicada dempuèi mai de dètz ans.