Tanplan en Superliga coma en NRL, la darrièra jornada de la fasa de classament a vist d’esquipas daissar córrer per aver pas de nafrats o jogaires suspenduts per las fasas finalas.

Dètz Dragonets valents dins lo grand banh
 
Atal, a Wigan, Steve McNamara mandèt una esquipa amb Drinkwater, sièis jogaires amb una pichona experiéncia de la Superliga e dètz jogaires de la resèrva. Aqueles joves determinats tenguèron mièja ora. Menats 6-0, prenguèron tres ensages abans la pausa, puèi quatre de mai dins lo segond temps. Drinkwater capitèt de marcar sus una palma perduda. Coma lo tustaire local o ensaquèt tot, aquò faguèt 4-48 a la sortida. Los 10 Dragonets an viscut una polida experiéncia e coneisson ara lo nivèl de jòc de la Superliga!
 
Salford aviá pas enveja de se desplaçar divendres a Perpinhan. Lor esquipa B foguèt batuda per Warrington: 14-32. En acabant en seisena posicion, anirà jogar lo barratge dissabte a Huddersfield. Leeds, venceire de Castleford 14-6, serà atal l’òste dels Dragons aqueste divendres a 9 oras del ser dins un estadi Brutus que deuriá afichar complet.
 
Los tolosans acabavan la sason del costat del campion e cap de fila St Helens. Capitèron de menar 16-12 a l’ora de jòc, abans de plegar 16-36.
 
 
NRL: Canberra es ben lo uèiten qualificat
 
En NRL, Penrith mandèt pas cap de titulars costumièrs cò dels Vaquièrs. Aquò permetèt a aquestes de ganhar 38-8.
 
Las Anguialas baton la Tempèsta de Melbourne, redusida a un ventolet: 22-14 e integran atal lo naut del tablèu.
 
Los Polets baton los Lapinons 26-16 per l’estrena de lor estadi tot nòu e los tornaràn reçaupre per la partida eliminatòria. La desfaita dels Bròncos 12-22 cò dels Dragons significava l’assegurança per Canberra d’èsser lo ueiten e darrièr qualificat.
 
Una pichona remembrança del sistèma australian. Los primièrs quatre jògan las partidas qualificativas: los venceires en mièja finala; los perdeires en barratge. Al programa: Penrith-Parramatta (divendres), Làmias-Vaquièrs (dissabte).
 
Del cinquen al ueiten, jògan las partidas eliminatòrias: los ganhaires en barratge, los perdeires a l’ostal. Al programa: Melbourne-Canberra (dissabte) e Polets-Lapinons (dimenge). Aquò promet!
 
 
Los U19 son en forma
 
Dissabte, lo primièr torn del campionat europèu dels U19 en Itàlia se jogava dins un format inedit de partidas de vint minutas. L’esquipa de França ganhèt sas sièis partidas: 22-0 contra Itàlia, 24-0 contra Irlanda, 24-0 contra Ucraïna , 2-0 contra Galas, 8-4 contra Anglatèrra e 28-0 contra Serbia.
 
En mièja finala, aqueste dimars, los Blaus rescontraràn Ucraïna que capitèt de batre Irlanda 14-12 dins una partida decisiva; l’autra partida opausarà Anglatèrra e Galas.
 
De son costat, la formacion francesa de XIII-cadieral jogava dissabte a Fitor una partida de preparacion a la Copa del Mond contra Espanha. La partida virèt a l’entraïnament amb una victòria sus la marca de 108-4 pels Blaus.
 
 
 
 
Alan Roch