Tot aviá plan començat aqueste divendres de ser per aqueste quart de finala de Superliga entre los Dragons e Leeds: acuèlh bèl dels jogaires, bandièras e tifo, en seguida la minuta de silenci e l’imne anglés per saludar la reina desapareguda, puèi la partida comencèt.
 
Se saupèt lèu que los debats serián d’una brava intensitat. Alara que Mitchel Pearce pren un jaune, en inferioritat numerica, los Dragons prenon l’avantage amb doas penalitats de Sam Tomkins, mas dins las darrièras 5 minutas del primièr temps, los catalans van encaissar dos ensages e se trapar menats 12-4.
 
A la represa, una passa a pè permet als Sang e Aur de marcar pel centre Whare e de tornar a 10-12. La tension es fòrta: ven a McIlorum de prene un jaune. Sus un còp de pè a seguir, Liam Sutcliffe marca son tresen ensag (18-10). Dudson a dreit a un roge, puèi Pearce a son segond jaune. Hardaker ajusta una penalitat. Sus la marca de 20-10, Leeds contunharà la competicion. Serà pas lo cas de Dragons qu’an prepausat un jòc tròp estequit, mas tres jaunes e un roge fan tròp a respècte d’angleses que joguèron pas eles tanpauc amb las mans dins las pòchas! Aquò pòt explicar los noms d’aucèls (eufemisme) que racompanhèron l’arbitre al vestiari.
 
Fin de competicion pels catalans que faguèron somiar en debuta de campionat mas que coneguèron un estiu complicat, entre nafraduras e sancions, que la conclusion tròp logica n’es aquesta darrièra partida de la sason .
 
 
Salford en mièja finala
 
En Anglatèrra, a la diferéncia d’autres espòrts, lo XIII mantenguèt la partida prevista aqueste dissabte. Huddersfield recebiá Salford. Los Diables Roges s’impausèron netament: 28-0. Las mièjas finalas veiràn doncas las oposicions entre Saint Helens e Salford d’un caire e Wigan contra Leeds d’autre caire.
 
 
U19: los angleses campions d’Euròpa
 
En Itàlia, los joves franceses avián ganhat lo primièr torn del campionat d’Euròpa dels U19: 6 victòrias dins las partidas de 20 minutas. En mièja finala, avián dominat Ucraïna: 62-7.
 
En finala, aqueste dissabte, tornavan trapar los angleses. Los Blaus menavan 8-0 a la pausa, mas passèron la màger part del segond temps a defendre. Finiguèron que pleguèron e daissèron los angleses emportar lo trofèu (14-12).
 
 
NRL: Pantèras e Vaquièrs qualificats per las mièjas finalas
 
En Austràlia, lo primièr torn de las pelhòfas se pòt resumir atal: Pantèras e Vaquièrs en mièja finala; Tempèsta e Polets a l’ostal; barratges a venir entre Parramatta e Canberra (divendres) e entre Làmias e Lapinons (dissabte).
 
Dins lo naut del tablèu, divendres, Penrith daissèt gaire d’esper a Parramatta: 27-8. Mai disputada, dissabte, foguèt la partida entre las Làmias e de Vaquièrs qu’egalizèron a 30 pertot a la 79a minuta, puèi s’anèt fins a la segonda prolongacion. Tot s’acabèt a la 93a minuta de jòc per un tombat de 45 mètres de Valentine Holmes que balhèt la victòria als Vaquièrs: 32-30.
 
Dins lo bas del tablèu, dissabte, suspresa a Melbourne ont Canberra pren lo dessús sus una formacion en baissa de forma sus la fin de la competicion: 28-20. La darrièra partida èra la classica de las classicas de las oposicions entre las doas formacions màgers de Sydney: los Polets e los Lapinons. Foguèrem pas deçauputs: sèt cartons jaunes, de jogaires arrestats sus commocions; los Lapinons capitèron de marcar dos còps alara que se trapavan a 11 contra 13, puèi servèron l’avantage per se ganhar la qualificacion: 30-14.
 
 
 
Alan Roch