Divendres al ser, los Dracs recebèron una leçon de rugbi cò de Wigan. Resistèron una mièja oreta abans de plegar totalament. Planchòt clar e sens discutida: 38-0. Se caldrà pas mancar tre dissabte a 6 oras del vèspre a Brutús per la recepcion dels Vikings de Widnes.
 
En Australia, s’es tenguda la primièra jornada del campionat NRL 2013. Se Sony Williams de retorn a tretze marquèt un ensag, empachèt pas son equipa dels Sydney Roosters de se far batre pels Lapinons de South Sidney: 28-10 .
 
Dissabte, lo temps èra al bèl al Molin de Lesinhan per la primièra mièja-finala de la Copa de França entre l’ASCarcassona, venceira en 2012, e los vesins limosencs. Carcassona comença del melhor del biais amb un ensag del pilar reconvertit alièr Oseà Sadrau tre l’entama, puèi l’arrièr Guiraud marca al tèrme d’una ataca collectiva que traversa tot lo terren. Mas Taylor, lo joquèr medical Roge e negre, marca al pè dels pals a la 38a. Carcassona recupera la pauma sul còp de pè de remandadís e Sabri libera una bala d’ensag per Offerdhal. Coma Guiraud transformèt los dos darrièrs ensags, los jaune e negre menan logicament 16-6 a la pausa.
 
A la represa, Murcia tusta a seguir, la pauma rebombís sus la proteccion dels pals e torna dins los braces d’Herold que marca. Ramage transforma e Limós torna a 16-12. Alberolà passa una penalitat e Jovani punta un novèl ensag transformat pel quite Alberòla: demòra mièja-ora de jòc e Carcassona a pres los davants: 24-12.  Mas Limós vòl pas morir! Teixidó trapa un trauquet al ras del tengut: 18-12. L’arbitre manda Romaric Bembà sul banc amb un carton jaune per un placatge naut. Los Roge e negre profitan de la superioritat numerica per egalizar (novèl ensag de Taylor e transformacion de Ramage), puèi pren l’avantatge 26-24 sus una penalitat encapada perdon dobertura. La maquina limosenca es lançada, Carcassona torna pas prene vam e encaissa dos novèls ensags. La replica d’Anderson a la 78a capita pas de faire passar l’amarum de la desfaita: 36-28. E los Limosencs se la son plan ganhada aquela finala amb las eliminacions de Lesinhan en 1/8 e dels Dragonets en 1/4, cada còp sul tarrenc de l’adversari e la victòria arrancada aqueste dissabte. Una qualificacion que salva ja una sason mancada en campionat.
 
Dimenge, a Albi, ont se joguèt fin finala l’autra mièja-finala que se poguèt pas debanar coma previst en Rosselhon aprèp los auratges de la setmana, calguèt anar fins a la prolongacion e a la mòrt sobta per conéisser lo nom del segond finalista. Lo Tolosa Olimpic aviá pres los davants: 18-10 a la pausa, puèi 26-14. Mas Avinhon pleguèt pas e tornèt a 26 pertot. Las equipas demorèron mai de dètz minutas sus aquesta marca, sens cap de punt marcat e de decision. Ne calguèt passar per la prolongacion: a la mòrt sobta (lo primièr que marca ganha). Aprèp cinc minutas de suplement, Liguoro marcava l’ensag de la victòria qu’Arnaud transformava per la fòrma: 32-26 .
 
Aquò balharà pel dissabte 11 o lo dimenge 12 de mai, a l’estadi Domèc de Carcassona, una finala de Copa inedita entre los Lengadocians de Limós e los Provençals d’Avinhon.
 
Per çò qu’es de la Cup anglesa, aqueste dimècres de vèspre, los Dracs, Tolosa e l’ASCarcassona saupràn qunas equipas afrontaràn lo 6 o lo 7 d’abril.
 
Per la dimenjada venenta, lo campionat Elit repren sos dreites amb dimenge, un novèl derbi audenc (Lesinhan reçauprà Limós, a 16h) e en Salanca una confrontacion entre lo primièr, Pià, e son segond, Carcassona (15h30). Al programa tanben: la recepcion d’Avinhon pels Dragonets a Sant Estève e la de Vilanòva per Lescura.
 
 
 
 
Alan Roch