Una granda làmia blanca d’environ 5 mètres de long es estada vista e filmada sus las còsta de Camarga. De pescadors l’observèron lo 12 de setembre passat a l’embocadura de Ròse, çò rapòrta France 3. S’agís d’una observacion plan rara; segon Nicolas Ziani, responsable scientific del Grop Focèu d'Estudi de las Làmias, “en Mediterranèa, solament una quarantena de làmias blancas serián estadas apercebudas près dei còstas dempuèi l’Edat Mejana”.
 
La làmia observada es, segon Ziani, una femèla que presenta de tralhs de nhacadas en consequéncia d’un acoblament recent amb un mascle. A mai, lo ventre fa pensar qu’es emprenhada. La làmia deviá èsser en aquel endrech per se noirir, sus la riba esquerra de Ròse a mai o mens nòu quilomètres de l'embocadura del flume.
 
A l’ora d’ara i auriá unes 250 individús d’aquela espècia dins la mar Mediterranèa, segon una estimacion aproximativa. En 2018 èra considerada gaireben estencha. Ziani precisa que la reglamentacion de 2009 qu’enebissiá la pesca del ton roge auriá fach fruch, puèi qu’es lo principal aliment de la làmia blanca.
 
Las làmias blancas son una espècia plan viatjaira: percorron d’efièch aperaquí 20 000 quilomètres entre lor zòna de naissença e los endreches ont se noirisson. Son d’individús fòrça solitaris que se mesclan pas amb d’autras espècias de làmias. Cap de las sièis espècias de làmia conegudas o fa.