Bandièra01 1180x150: Comuna de Tolosa

Actualitats

Rugbi de XIII: e de quatre Superliga de seguida per Saint Helens!

Lo capitani De sant-Helens James Roby reçaup lo trofèu del venceire
Lo capitani De sant-Helens James Roby reçaup lo trofèu del venceire

Tèxte legit

Aqueste dissabte de ser, 61 000 espectators seguiguèron a Manchester, dins l’estadi d’Old Trafford, la finala de la sason de Superliga entre Saint Helens e Leeds, e foguèron pas deçauputs. Al cap de 2 minutas, los Sants puntavan lo primièr ensag pel pilar Matty Lees al còr de la defensa advèrsa. N’ajustavan un autre pel jove alièr Jon Bennison sus un pichon còp de pè a ras de pelena. Los Sants dominavan la partida, mas, sus un darrièr balon, Kruise Leeming marcava per Leeds just abans la pausa (6-12).
 
Tre la represa, un ensag de Konrad Hurrel, passant lo braç per pausar la punta de la palma sus la linha, alara qu’èra blocat per 4 adversaris, tornarà faire la diferéncia. Los Sants i aniràn d’un quatren ensag aprèp una novèla passa al pè al sòl de Jack Welsby bonificada per Mark Percival.
 
Los Rinocèros arremosavan lors fòrças, marcavan un segond ensag per l’entremesa de Rhyse Martin, mas èra tròp tard.
 
Los Sants mestregèron d’un cap a l’autre lo rescontre per conquistar un desen trofèu de Superliga e lo quatren de seguida al tèrme d’una partida vodada al jòc e a la circulacion de la palma.
 
Felicitacions tanben pel perdent qu’èra en fons de classament abans de cambiar d’entraïnaire e de sistèma de jòc, acabar 5n, e faire plegar en fasa finala a l’exterior Catalans e Wigan per disputar la finala. Mas la marcha èra tròp nauta.
 
 
NRL: finala entre Pantèras e Anguialas
 
En Austràlia, se jogavan las mièjas finalas de l’NRL.
 
Divendres, los Vaquièrs recebián las Anguialas. Los locals dominèron las primièras 35 minutas al punt de menar 12-0, mas dins las darrièras cinc minutas las Anguialas egalizavan. A la represa, los Vaquièrs tornèron prene l’avantagte 20-12 mas, mai realistas, las Anguialas de Parramatta se dobrisson lo camin per Sydney: 24-20.
 
Dissabte, dins un revenge de la finala passada, las Pantèras recebián los Lapinons. Un pauc lo meteis debanament que la velha: los Lapinons dominavan, menavan 12-0 mas la pausa se teniá sus una egalitat a 12 pertot. Los campions tornavan marcar d’entrada e los Lapinons trapèron pas cap de solucion per contestar la qualificacion de Penrith (32-12).
 
Dimenge, Penrith ensajarà de gardar son títol; Parramatta a pas jogat de finala dempuèi 2009. Partida a 10h30 del matin (ora occitana), de seguir sus BeInSports.
 
 
Elèit 1: represa del campionat
 
Lo campionat d’Elèit 1 repren aquesta primièra dimenjada d’octòbre.
 
Al programa, tres partidas dissabte: Carcassona-Avinhon, Lesinhan-Dragonets e Albi-St Gaudenç. Dimenge, se jogaràn: Limós-Pià e Vilanòva-Tolosa.
 
 
24 noms per la Copa del Mond
 
De mai, dissabte de ser, una esquipa de França B (justament compausada de jogaires d’Elèit 1), afrontarà los Cavalièrs angleses (los espèrs) a Merinhac.
 
La tièra dels 24 seleccionats franceses per la Copa del Mond es coneguda. Sens suspresa, i figuran los jogaires de Superliga dels Dragons Catalans (13, amb lo tongan Samisoni Langi que pòt defendre lo malhòt tricolòre) e 8 del Tolosa Olimpic (en prenent en compte Maxim Puèg que ven de signar a Albi) , mai los exiliats de Superliga (Morgan Escarré, de Salford) e del Championship: Springer (Featherstone) e Jouffret (Halifax). Los Blaus se recamparàn a Bordèu del 4 al 7 d’octòbre, abans de jogar una partida de preparacion contra Tònga a Halifax.
 
La formacion femenina s’articula a l’entorn de 11 jogairas de las Divessas Catalanas e 9 de l’Escura, mas la capitanessa Alicia Varela pòrta las colors de Tolosa Ovalia.
 
Dissabte, a Carcassona, los dotze jogaires de la formacion de XIII-cadieral joguèron una partida de preparacion que ganhèron 62-8 contra una seleccion de jogaires del campionat.
 
 
 
 
Alan Roch

 
 
 
abonar los amics de Jornalet

 

 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L\\\'Alan Carcassona
2.

E dimenge, finala del Championship entre Leigh e Batley.
Enjòc : la montada en SuperLiga.

  • 0
  • 0
L\'Alan Carcassona
1.

• Vist lo nombre de jogaires seleccionas en França-B de Tolosa, la partida contra Vilanòva es remesa.
• Femininas Australia : finala entre Paramattà e Newcastle
• Internacional : A Brisbana, lo XIII del Primièr ministre australian bat los Papós : 64-14

  • 0
  • 0

Escriu un comentari sus aqueste article