Bandièra01 capçalera 1180x150: Botiga

Actualitats

Internacional

Burkina Faso: nòu còp d’estat militar

Los putchistas acusan Damiba de s’èsser desvirat de las idèas de l’MPSR, que faguèt lo còp d’estat en genièr passat

Tèxte legit

Nòu còp d’estat en Burkina Faso contra lo govèrn putschista. Un grop de soldats guidats pel capitani de l’armada Ibrahim Traoré reversèron divendres passat lo coronèl Paul-Henri Sandaogo Damiba, uèch meses après que foguèt arribat al poder amb un còp d’estat. Los putschistas d’ara an anonciat, dins un messatge televisat, la suspension de la Constitucion e de la Carta de la Transicion, e la dissolucion del govèrn e de l’Assemblada. Las frontièras son barradas.
 
Ara, lo camp de Damiba e lo de Traoré son totjorn en discussion per trobar una sortida de la crisi, e la situacion dins la capitala, Oagadogó, es de nauta tension.
 
Los putschistas d’ara asseguran que tanben son del Movement Patriotic per la Salvagàrdia e la Restauracion (MPSR) que faguèt lo còp d’estat en genièr passat. Ara, acusan Damiba de s’èsser desvirat de las idèas del movement. “Volèm un vertadièr sénher de la guèrra que libère lo país”, çò diguèt un d’eles a Infowakat.
 
La jornada de divendres comencèt amb los soldats revoltats que prenián lo contraròtle de divèrsas zònas estrategicas d’Oagadogó, de bancas e de comèrcis.
 
Aqueste nòu còp d'Estat s’es produch après una autra ataca terrorista que lo patiguèt una caravana de provesiments escortada per l’armada lo 26 de setembre passat dins lo nòrd del país. Lo bilanç provisòri seriá d’11 militars mòrts e de 28 nafrats amb una cinquantena de civils portats desapareguts.
 
Los atemptats jihadistas de grops pròches d’Al Qaida e de l’Estat Islamic son frequents dins la zòna. Aqueste darrièr foguèt lo segond del mes de setembre. Aquela inseguretat a desplaçat aperaquí dos milions de personas dins Burkina Faso.
 
 
 
 

 
abonar los amics de Jornalet

 

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
1.

Còp d'estat o pas còp d'estats, son totjorn las armas e la corrupcion que dominan. Unes vòlon s'alinhar sul modèl occidental capitalista necessariament injust, d'autrers, que non ne vòlon, s'alinhan adara sus de modalitats de vidas arcaïcas (de fa 1450 ans) complètament calugas e dessenadas. De quin biais vos volètz far alienar ? Aquí la soleta question que se pausa a las paures pòbles d'Africa.

  • 7
  • 2

Escriu un comentari sus aqueste article