L’Ofici Public de la Lenga Occitana lança sa cadena d’eveniments en dirècte sus la plataforma Twitch. Lo primièr eveniment se farà dins l’encastre de la Fèsta de la Sciéncia, en partenariat amb lo Ministèri de l’Ensenhament Superior e de la Recèrca.
 
Lo primièr eveniment organizat per l’ÒPLO sus Twitch se tendrà deman, 11 d’octòbre, a 17h, amb un debat a l’entorn del subjècte “Biodiversitat e diversitat de las lengas: quina(s) lenga(s) per pensar e viure lo Mond de deman?”. L’eveniment aurà luòc dins l’encastre de la Fèsta de la Sciéncia e es labelizat pel Ministèri de l’Ensenhament Superior, de la Recèrca e de l’Innovacion, la region dicha Occitània e las coordinacions regionalas.
 
 
Un mèdia participatiu e jove
 
Twitch es un servici de difusion vidèo en dirècte fòrça conegut dels joves e de totes los jogaires en ret. La plataforma permet tanben la difusion de contenguts de caractèr informatiu o educatiu que son nombre aumenta de faiçon exponenciala aquestes darrièrs meses. Qualques mèdias coma Arte o France TV tanben se servisson de Twitch per conquistar un public, mai que mai jove, alonhat dels canals d’informacion convencionals, en li prepausant d’interagir en dirècte suls subjèctes que los tòcan.