Un vilatge auvernhat d’unes 400 abitants aurà una de las primièras minas de liti d’Euròpa. Echassèiras, en Combralha, aculhirà d’aicí a 2027 un tenement que permetrà d’esquipar 700 000 batariás de veituras electricas per an. Lo projècte l’anoncièt diluns de matin lo grop Imerys, dedicat als minerals industrials, e ajudarà Euròpa a se desfar de sa dependéncia quasi completa de China pel liti necessari per las batariás de las veituras electricas, supausadas èsser los sols veïculs nòus a poder èsser venduts dins l'Union Europèa a partir de 2035, çò rapòrta La Montagne.
 
Las “concentracions e quantitats” de liti son estadas jutjadas “plan atractivas” a Echassèiras, sul sit de Bèlveire, qu'aculhís dempuèi 1850 una carrièra que produtz 30 000 tonas de caolin per an destinat a la porcelana o al carrelatge. Dempuèi los ans 1960, lo Burèu de Recèrcas Geologicas e Minièras (BRGM) aviá identificat la preséncia de liti dins aquel sossòl. Mas Imerys ignorava fins ara que lo sit podiá èsser rendable.
 
S’estima lo jaç a l’entorn d’un milion de tonas d’oxid de liti, e que poiriá produire 34 000 tonas d’idroxid de liti per an a partir de 2028 per una durada d’almens 25 ans. Aquela donada equival a la produccion per an de 700 000 batariás per de veituras electricas.
 
Lo grop promet un milièr d’emplecs dirèctes e indirèctes sus dos sits en Auvèrnhe, lo d’extraccion e una usina de purificacion dels minerals e de transformacion en idrioxid de liti.
 
De veire l’impacte environamental qu’aurà aquel tenement. Imerys informa que la mina adoptariá un estandard internacional per far un trabalh d'elaboracion, IRMA, qu'a per tòca de reduire los degalhs toxics e de minimizar lo consum d'aiga. A mai, l’esplecha se farà en sosterranh per minimizar las poscas. Lo transpòrt de las ròcas se farà per canalizacion e camin de fèrre per evitar los camions entre la mina e lo sit industrial. Segon aquelas donadas, lo tenement auvernhat emetrà 8 kg de CO₂ per tona de liti, mentre qu'Austràlia e China n’emeton 16 e 20 kg respectivament.
 
Sus la desena de projèctes europèus d'esplecha de liti, lo d'Imerys es lo segond plus important, dempuèi l'abandon del projècte de Rio Tinto en Serbia en genièr, e darrièr lo de l’start-up Vulcan en Alemanha.

 

 

C'est ici à Echassières dans cette mine de kaolin à la frontière de l'#Allier et #Puy-de-Dome que sera donc exploitée l'une des plus importantes mines de #lithium d'Europe qui pourra équiper jusqu'à 700.000 véhicules/an en batteries électriques. pic.twitter.com/NUgLMP3kSi

— Pierre Geraudie (@PGeraudie) October 24, 2022

 

Exploitation d'une mine de #lithium à Echassières (#Allier), le gisement pourrait permettre une exploitation de 34.000 tonnes d'hydroxyde de lithium pendant 25 ans... pic.twitter.com/GOUHKZYrvd

— La Montagne Vichy (@Montagne_Vichy) October 24, 2022